৯ উইকেটত পৰাস্ত অষ্ট্ৰেলিয়া। ২২ আগষ্টত দ্বিতীয়খন টেষ্ট, শৃংখলা সমতা স্থাপন কৰিব পাৰিবনে অষ্ট্ৰেলিয়াই? অষ্ট্ৰেলিয়াৰ মাটিত ইতিহাস ৰচিলে বাংলাদেশে। ডাৰউইনৰ মৰাৰা ক্ৰিকেট গ্ৰাউণ্ডত অনুষ্ঠিত প্ৰথমখন টেষ্টত শক্তিশালী অষ্ট্ৰেলিয়াক ৯ উইকেটত পৰাস্ত কৰি প্ৰথমবাৰৰ বাবে অষ্ট্ৰেলিয়াৰ মাটিত টেষ্ট জয়ৰ সোৱাদ লাভ কৰিলে বাংলাদেশে। ১৩ আগষ্টৰ পৰা আৰম্ভ হোৱা টেষ্টখন চতুৰ্থ দিনতেই সমাপ্ত হয়। প্ৰথম ইনিংছতে বাংলাদেশে মেচখনত নিজৰ আধিপত্য প্ৰতিষ্ঠা কৰে। অষ্ট্ৰেলিয়াই প্ৰথম ইনিংছত মাত্ৰ ১৯৮ ৰানতে অল আউট হোৱাৰ বিপৰীতে বাংলাদেশে ৪২৬ ৰান সংগ্ৰহ কৰে। বাংলাদেশৰ হৈ তানজিদ হাছানে শতকীয় ইনিংছ খেলি দলটোক শক্তিশালী স্থিতি প্ৰদান কৰে। তেওঁ ১০১ ৰান সংগ্ৰহ কৰে। ইয়াৰ লগতে মেহেদী হাছান মিৰাজেও ৬৫ ৰানৰ গুৰুত্বপূৰ্ণ ইনিংছ খেলি দলৰ অগ্ৰগতি বৃদ্ধি কৰে।
প্ৰথম ইনিংছত ২২৮ ৰানৰ বৃহৎ অগ্ৰগতি লাভ কৰাৰ পাছত দ্বিতীয় ইনিংছত অষ্ট্ৰেলিয়াই কিছু প্ৰত্যাৱৰ্তনৰ চেষ্টা চলায়। কেমেৰন গ্ৰীনে দৰ্শনীয় শতক অৰ্জন কৰি দলটোক বিপদৰ পৰা উদ্ধাৰৰ চেষ্টা কৰে। গ্ৰীনে ১০৪ ৰান সংগ্ৰহ কৰে। কিন্তু বাংলাদেশৰ বলিং আক্ৰমণৰ সন্মুখত বাকী বেটাৰসকলে বিশেষ প্ৰতিৰোধ গঢ়ি তুলিব নোৱাৰিলে। অষ্ট্ৰেলিয়াৰ দ্বিতীয় ইনিংছ ২৮৪ ৰানতে সমাপ্ত হয়।
বাংলাদেশৰ হৈ বলিঙত উজ্জ্বল প্ৰদৰ্শন আগবঢ়ায় মেহেদী হাছান মিৰাজ আৰু হাছান মাহমুদে। মিৰাজে দ্বিতীয় ইনিংছত ৫টা উইকেট দখল কৰি অষ্ট্ৰেলিয়াৰ বেটিং লাইনআপত খহনীয়া সৃষ্টি কৰে। আনহাতে হাছান মাহমুদে সমগ্ৰ মেচখনত মুঠ ৯টা উইকেট দখল কৰি মেচৰ শ্ৰেষ্ঠ খেলুৱৈৰ সন্মান লাভ কৰে।
অষ্ট্ৰেলিয়াই দ্বিতীয় ইনিংছত ২৮৪ ৰান কৰাত বাংলাদেশৰ সন্মুখত বিজয়ৰ বাবে লক্ষ্য বান্ধি দিয়া হয় মাত্ৰ ৫৭ ৰান। সহজ লক্ষ্য আগত লৈ বাংলাদেশে আৰম্ভণিতে এটা উইকেট হেৰুৱায় যদিও শেষত ১৪.২ অভাৰত ৫৭/১ ৰান সংগ্ৰহ কৰি মেচখন নিজৰ নামত কৰে। মোমিনুল হকে বিজয়ৰ ৰান সংগ্ৰহ কৰি ঐতিহাসিক জয় নিশ্চিত কৰে।
এই জয় বাংলাদেশ ক্ৰিকেটৰ বাবে এক ঐতিহাসিক মুহূৰ্ত। অষ্ট্ৰেলিয়াৰ মাটিত এয়া বাংলাদেশৰ প্ৰথমটো টেষ্ট জয়। এই জয়েৰে দুয়োখন টেষ্টৰ শৃংখলাত বাংলাদেশে ১-০ৰ অগ্ৰগতি লাভ কৰিছে। বিশ্ব টেষ্ট চেম্পিয়নশ্বিপৰ দৃষ্টিকোণৰ পৰাও জয়টো বাংলাদেশৰ বাবে যথেষ্ট গুৰুত্বপূৰ্ণ।
ইফালে, অষ্ট্ৰেলিয়াৰ অধিনায়ক পেট কামিন্সে স্বীকাৰ কৰিছে যে বাংলাদেশে মেচখনৰ সকলো দিশতে অষ্ট্ৰেলিয়াক অতিক্ৰম কৰিলে। এতিয়া ২২ আগষ্টৰ পৰা মেকেত অনুষ্ঠিত হ’ব দ্বিতীয়খন টেষ্ট, য’ত শৃংখলা সমতা স্থাপন কৰাৰ লক্ষ্যৰে খেলপথাৰত নামিব অষ্ট্ৰেলিয়া।
