বিশ্ব ফুটবলৰ মহাতাৰকা তথা পৰ্তুগাল দলৰ অধিনায়ক ক্ৰিষ্টিয়ানো ৰোনাল্ডোৱে নিজৰ খেলুৱৈ জীৱনৰ পৰা অৱসৰ গ্ৰহণৰ স্পষ্ট ইংগিত প্ৰদান কৰিছে। তেওঁৰ মতে, আগন্তুক বৰ্ষটো সম্ভৱতঃ তেওঁৰ পেছাদাৰী ফুটবল কেৰিয়াৰৰ অন্তিমটো বৰ্ষ হ’ব। লাইফষ্টাইল আলোচনী Vogueক দিয়া এক সাক্ষাৎকাৰত ৪১ বছৰীয়া এই কিংবদন্তি ফুটবলাৰগৰাকীয়ে প্ৰকাশ কৰে যে খেলুৱৈ হিচাপে সম্ভৱতঃ এইটোৱেই তেওঁৰ শেষ বছৰ আৰু তেওঁ খেলপথাৰত এক উল্লেখনীয় তথা স্মৰণীয় ঐতিহ্য এৰি থৈ যাব বিচাৰে।
২০০২ চনত স্পৰ্টিং ক্লাৱৰ হৈ কেৰিয়াৰ আৰম্ভ কৰা ৰোনাল্ডোৱে তেওঁৰ দুই দশকজোৰা যাত্ৰাত মানচেষ্টাৰ ইউনাইটেড, ৰিয়েল মাদ্ৰিদ, জুভেণ্টাছ আৰু বৰ্তমানৰ ক্লাব আল-নাচৰৰ হৈ খেলি বহুতো ঐতিহাসিক ট্ৰফী অৰ্জন কৰিছে। পাঁচবাৰকৈ সন্মানীয় ‘বেলন ডি’অৰ’ (Ballon d’Or) খিতাপ জয় কৰা তাৰকাগৰাকীয়ে এইপৰ্যন্ত নিজৰ ক্লাৱ আৰু দেশৰ হৈ মুঠ ৯৭৬টা গ’ল স্ক’ৰ কৰিছে। বৰ্তমান তেওঁ ছৌদি প্ৰ’ লীগৰ ক্লাৱ আল-নাচৰৰ হৈ খেলা অব্যাহত ৰাখিছে আৰু শীঘ্ৰেই ১,০০০টা কেৰিয়াৰ গ’লৰ ঐতিহাসিক মাইলৰ খুঁটি স্পৰ্শ কৰাৰ দিশে আগবাঢ়িছে।
ফুটবলৰ পৰা বিদায় লোৱাৰ পিছৰ পৰিকল্পনা সন্দৰ্ভত ৰোনাল্ডোৱে উল্লেখ কৰে যে ফুটবল এৰাৰ পিছত জীৱনত সৃষ্টি হ’বলগীয়া শূন্যতা পূৰাবলৈ তেওঁ নিজকে বিভিন্ন কামত ব্যস্ত ৰাখিব। বিগত ২৫ বছৰৰ কঠোৰ পৰিশ্ৰম আৰু ত্যাগৰ অন্তত তেওঁ ভৱিষ্যতে অধিক ভ্ৰমণ কৰা, নিজৰ পচন্দৰ পেডেল (Padel) খেল উপভোগ কৰা তথা খেলা আৰু পৰিয়ালৰ সৈতে জীৱন উপভোগ কৰাৰ পৰিকল্পনা কৰিছে।
