ভাৰতীয় জনতা পাৰ্টিৰ (বিজেপি) ৰাষ্ট্ৰীয় সভাপতি নীতিন নবীনে দলৰ কেন্দ্ৰীয় সমিতিত এক ব্যাপক সাংগঠনিক সালসলনি ঘটাইছে। এই নতুন সমিতিত ১৩ গৰাকী ৰাষ্ট্ৰীয় উপ-সভাপতি, ৮ গৰাকী ৰাষ্ট্ৰীয় সাধাৰণ সম্পাদক আৰু ১৬ গৰাকী ৰাষ্ট্ৰীয় সভাপতিৰ লগতে বিভিন্ন গুৰুত্বপূৰ্ণ বিষয়ববীয়াক অন্তৰ্ভুক্ত কৰা হৈছে। এই নতুন গাঁথনিয়ে বিজেপিৰ সৰ্বকনিষ্ঠ ৰাষ্ট্ৰীয় সভাপতি হিচাপে নীতিন নবীনৰ নেতৃত্বত দলটোক এক নতুন গতি প্ৰদান কৰিছে। এই সমিতিত ৰাজস্থানৰ প্ৰাক্তন মুখ্যমন্ত্ৰী বসুন্ধৰা ৰাজে আৰু জ্যেষ্ঠ নেতা ৰাম মাধৱক ৰাষ্ট্ৰীয় উপ-সভাপতি হিচাপে নিযুক্তি দিয়াৰ লগতে প্ৰাক্তন কেন্দ্ৰীয় মন্ত্ৰী স্মৃতি ইৰানীক দলৰ নতুন ৰাষ্ট্ৰীয় সাধাৰণ সম্পাদক হিচাপে দায়িত্ব অৰ্পণ কৰা হৈছে।
উপ-সভাপতিৰ পদত বসুন্ধৰা ৰাজেৰ উপৰিও বৈজয়ন্ত জয় পাণ্ডা, ৰেখা বাৰ্মা আৰু তাৰিক মনচুৰক বাহাল ৰখা হৈছে। লগতে তীৰ্থ সিং ৰাৱত, ডি পুৰন্দেশ্বৰী, বৰ্ষাবেন নৰেন্দ্ৰভাই যোশী, ভাৰতী প্ৰবীণ পাৱাৰ, মনপ্ৰীত সিং বাদল, লাল সিং আৰ্য্য, এম নাগৰাজা আৰু মধুচন্দ্ৰ কৰক নতুন উপ-সভাপতি হিচাপে মনোনীত কৰা হৈছে। আনহাতে ছৌদান সিং, সৰোজ পাণ্ডে, ডি কে অৰুণা, এম চুবা আও, আব্দুল্লা কুট্টী, লক্ষ্মীকান্ত বাজপেয়ী আৰু লতা উচেন্দ্ৰীক উপ-সভাপতিৰ তালিকাৰ পৰা বাদ দিয়া হৈছে।
স্মৃতি ইৰানীৰ লগতে বিনোদ তাওড়ে, সুনীল বনছল, বিপ্লৱ কুমাৰ দেৱ, সতীশ পুনিয়া, গজেন্দ্ৰ পেটেল, হৰিশ দ্বিবেদী আৰু সঞ্জয় ভাটিয়াক দলৰ ৰাষ্ট্ৰীয় সাধাৰণ সম্পাদকৰ দায়িত্ব দিয়া হৈছে। বি এল সন্তোষে সংগঠনৰ ৰাষ্ট্ৰীয় সাধাৰণ সম্পাদক হিচাপে পূৰ্বৰ দায়িত্ব অব্যাহত ৰাখিব। ইয়াৰ উপৰিও ফানগনন কন্যাক, অনিল এণ্টনী, কে সুৰেন্দ্ৰন, কে কবিতা পাটিদাৰকে ধৰি কেইবাগৰাকীও নেতাক ৰাষ্ট্ৰীয় সম্পাদক হিচাপে নিযুক্তি দিয়া হৈছে। পীয়ূষ গোৱেলক ৰাষ্ট্ৰীয় কোষাধ্যক্ষ আৰু তৰুণ চুগক কেন্দ্ৰীয় কাৰ্যালয়ৰ দায়িত্ব প্ৰদান কৰা হৈছে।
এই সালসলনিৰ অংশ হিচাপে বিজেপিৰ ডিজিটেল আৰু যোগাযোগ বিভাগতো এক ডাঙৰ পৰিৱৰ্তন ঘটোৱা হৈছে। অমিত মালব্যক দলৰ আইটি চেলৰ মুৰব্বী পদৰ পৰা আঁতৰাই ছত্তীশগড়ৰ দীপক মহাষ্কেক সেই দায়িত্ব অৰ্পণ কৰা হৈছে, যদিও অনিল বালুনীয়ে মিডিয়া ইন-চাৰ্জ হিচাপে নিজৰ কাম অব্যাহত ৰাখিব। প্ৰধানমন্ত্ৰী নৰেন্দ্ৰ মোদীয়ে নতুন বিষয়ববীয়াসকলক অভিনন্দন জনাই দল শক্তিশালী কৰাৰ ক্ষেত্ৰত তেওঁলোকৰ সফলতা কামনা কৰিছে। ২০২৭ চনত হ’বলগীয়া উত্তৰ প্ৰদেশ, গুজৰাট, পঞ্জাৱ আদি ৰাজ্যৰ বিধানসভা নিৰ্বাচনৰ প্ৰতি লক্ষ্য ৰাখি এই নতুন কেন্দ্রীয় সমিতিয়ে দলীয় কাম-কাজ পৰিচালনা কৰাত বিশেষ ভূমিকা পালন কৰিব।
