উচ্চতম ন্যায়ালয়ে স্পষ্ট কৰি দিছে যে কোনো ব্যক্তি সন্ধানহীন হ’লে বয়স বা লিংগ নিৰ্বিশেষে প্ৰত্যেকৰে ক্ষেত্ৰতে আৰক্ষীয়ে তৎকালীনভাৱে এজাহাৰ (FIR) ৰুজু কৰাটো বাধ্যতামূলক।
ন্যায়াধীশ আছানুদ্দিন আমানুল্লা আৰু ন্যায়াধীশ আৰ মহাদেৱনক লৈ গঠিত এখন খণ্ডপীঠে এই নিৰ্দেশনা কাৰ্যকৰী নকৰা ৰাজ্য আৰু কেন্দ্ৰীয় শাসিত অঞ্চলসমূহক সতৰ্ক কৰি দিয়ে। আদালতে নিৰ্দেশ দিয়ে যে যিসমূহ ৰাজ্যই এই নিৰ্দেশ মানি চলা নাই, সেই ৰাজ্যসমূহৰ মুখ্য সচিব আৰু আৰক্ষী প্ৰধানসকলে (DGP) আদালতত উপস্থিত হৈ ইয়াৰ উত্তৰ দিব লাগিব আৰু তেওঁলোকৰ বিৰুদ্ধে কিয় আদালত অৱমাননাৰ ব্যৱস্থা গ্ৰহণ কৰা নহ’ব, তাৰ ব্যাখ্যা দাঙি ধৰিব লাগিব।
আদালতে পূৰ্বেও স্পষ্ট কৰিছিল যে কোনো ব্যক্তি নোহোৱা ঘটনাৰ খবৰ পালে কোনো ধৰণৰ প্ৰাৰম্ভিক তদন্ত নকৰাকৈয়ে আৰক্ষীয়ে লগে লগে FIR ৰুজু কৰিব লাগিব। ইয়াৰ উপৰিও সন্ধানহীন শিশুসকলৰ ক্ষিপ্ৰ উদ্ধাৰ আৰু তেওঁলোকক পৰিয়ালৰ সৈতে পুনৰ মিলনৰ বাবে বিশেষ ব্যৱস্থা গ্ৰহণৰ নিৰ্দেশনা দিয়া হৈছিল।
এই সমগ্ৰ বিষয়টোৰ পৰৱৰ্তী শুনানি অহা ৫ অক্টোবৰত অনুষ্ঠিত হ’ব।
