ছৈয়দ মুস্তাক আলী ট্ৰফীত ইতিহাস ৰচনা কৰিলে বৈভৱ সূৰ্যবংশীয়ে। বিহাৰৰ ১৪ বছৰীয়া বেটছমেনজন ঘৰুৱা টি-২০ প্ৰতিযোগিতাত শতক অৰ্জন কৰা আটাইতকৈ কম বয়সীয়া ক্ৰিকেটাৰ হিচাপে পৰিগণিত হয়। মঙলবাৰে ইডেন গাৰ্ডেনত মহাৰাষ্ট্ৰৰ বিৰুদ্ধে ৫৮টা বলত শতক সম্পূৰ্ণ কৰিলে বৈভৱে। আনহাতে, একেদিনাই পঞ্জাৱৰ বিৰুদ্ধে প্ৰতিযোগিতামূলক ক্ৰিকেটলৈ উভতি আহিছিল হাৰ্দিক পাণ্ডিয়া।
ছৈয়দ মুস্তাক আলী ট্ৰফীৰ আৰম্ভণিৰে পৰাই ক্ৰিকেট অনুৰাগীসকলে বৈভৱৰ প্ৰতি আগ্ৰহী হৈ পৰিছিল। কিন্তু বিহাৰৰ উপ-অধিনায়কজন সফল হ’ব পৰা নাছিল। মঙলবাৰে অনুৰাগীক সন্তুষ্ট কৰিলে বৈভৱে। পৃথ্বী শ্ব’ৰ দলৰ বিৰুদ্ধে অ’পেনিং কৰি তেওঁ আৰম্ভণিৰে পৰাই নিজৰ আগ্ৰাসী বেটিং আৰম্ভ কৰিছিল। শতক সম্পূৰ্ণ কৰাৰ বাটত তেওঁৰ বেটৰ পৰা ৭টা চাৰি আৰু ৭টা ছয় আহিছিল। শেষত বৈভৱে ৬১টা বলত ১০৮ ৰানৰ অপৰাজিত ইনিংছ খেলে। তেওঁৰ শতকৰ বাবেই বিহাৰে মহাৰাষ্ট্ৰৰ বিৰুদ্ধে ২০ অভাৰত ৩ উইকেট হেৰুৱাই ১৭৬ ৰান সংগ্ৰহ কৰে। বৈভৱৰ উপৰিও আয়ুষ লোহাৰুকাই বিহাৰৰ হৈ ভাল বেটিং কৰে। ১৭টা বলত ২৫ ৰানত অপৰাজিত হৈ থাকে।
আনহাতে, আঘাতৰ পৰা আৰোগ্য লাভ কৰি খেলপথাৰলৈ উভতি আহিছে হাৰ্দিক। যোৱা এছিয়া কাপত আঘাতপ্ৰাপ্ত হৈছিল বৰোদাৰ অলৰাউণ্ডাৰজন। ভাৰতত ক্ৰিকেট নিয়ন্ত্ৰণ ব’ৰ্ডৰ চিকিৎসা দলৰ পৰা ক্লিয়াৰেন্স লাভ কৰি মঙলবাৰে তেওঁক আৰম্ভণি একাদশত ৰাখিছিল ক্ৰুনাল পাণ্ডিয়াই। অৱশ্যে পঞ্জাৱৰ বিৰুদ্ধে ভাল প্ৰদৰ্শন কৰিব নোৱাৰিলে। হায়দৰাবাদৰ ২২ গজত ৪ অভাৰত ৫২ ৰান দি ১ উইকেট দখল কৰে পাণ্ডিয়াই।
দক্ষিণ আফ্ৰিকাৰ বিৰুদ্ধে টি-২০ শৃংখলাৰ পূর্বে হাৰ্দিক সুস্থ হৈ ঘূৰি অহাটোৱে সূৰ্যকুমাৰ যাদৱক কিছু সকাহ দিব পাৰে৷ ক্ৰিকেট অনুৰাগীসকলো উৎফুল্লিত হৈ পৰিছে। মঙলবাৰে হায়দৰাবাদৰ খেলপথাৰত প্ৰৱেশ কৰে এজন ক্ৰিকেট অনুৰাগী। নিৰাপত্তাৰক্ষীক এৰাই চলি হাৰ্দিকৰ ওচৰ পালেগৈ অনুৰাগীজন।
