২০২৫ বৰ্ষৰ চিকিৎসা বিজ্ঞানৰ নোবেল বঁটা সোমবাৰে ঘোষণা কৰা হৈছে। চিকিৎসা বিজ্ঞানৰ ক্ষেত্ৰত তিনিজন চিকিৎসকক যুগ্মভাৱে এই সন্মান প্ৰদান কৰা হৈছে। আমেৰিকাৰ মেৰী ই ব্ৰুংকো, ছান ফ্ৰান্সিস্কোৰ ফ্ৰেড ৰেমছডেল আৰু জাপানৰ ছিমন ছাকাগুচিয়ে এই বঁটা লাভ কৰিছে। এই তিনিওজনে পেৰিফেৰেল ইমিউন টলাৰেন্সৰ ওপৰত গৱেষণা কৰিছিল। এই গৱেষণাই ইমিউন চিষ্টেমৰ অসংগতিৰ ফলত হোৱা ৰোগবোৰৰ চিনাক্তকৰণ আৰু চিকিৎসাৰ ক্ষেত্ৰত উন্নতি সাধন কৰাত সহায় কৰিব। গৱেষণাৰ পৰা জানিব পৰা গৈছে যে, ইমিউন চিষ্টেমক কেনেকৈ নিয়ন্ত্ৰণ কৰিব পাৰি যাতে ই শৰীৰৰ অংগবোৰৰ ওপৰত আক্ৰমণ নকৰে।
ইয়াৰ মাজতে এইটোও জানিবলগীয়া যে, পেৰিফেৰেল ইমিউন টলাৰেন্স কি, যাৰ বাবে নোবেল বঁটা প্ৰদান কৰা হৈছে।
পেৰিফেৰেল ইমিউন টলাৰেন্স কি?
দিল্লীৰ আৰ এম এল হাস্পতালৰ মেডিচিন বিভাগৰ ডাইৰেক্টৰ প্ৰফেছৰ ডাঃ সুভাষ গিৰিয়ে কয় যে, ইমিউন চিষ্টেম হৈছে শৰীৰৰ এজন সৈনিক, যিয়ে শৰীৰক ৰোগ আৰু সংক্ৰমণৰ পৰা ৰক্ষা কৰে। ইমিউন চিষ্টেম যিমান শক্তিশালী হ’ব, ৰোগৰ সম্ভাৱনা সিমানেই কম হ’ব। কিন্তু কিছুমান ক্ষেত্ৰত শৰীৰে ভুলবশতঃ নিজৰ কোষৰ ওপৰত আক্ৰমণ কৰিবলৈ আৰম্ভ কৰে। ইয়াৰ ফলত বহুতো ৰোগ হয়, যাক অটোইমিউন ৰোগ বোলা হয়, যেনে- ৰিউমেটয়ড আৰ্থাৰাইটিছ আৰু লুপাছ।
ডাঃ সুভাষৰ মতে, পেৰিফেৰেল ইমিউন টলাৰেন্সৰ গৱেষণাৰ পৰা এইটো জানিব পৰা যাব যে অটোইমিউন ৰোগৰ চিকিৎসা কেনেকৈ কৰিব পাৰি আৰু শৰীৰে নিজৰ কোষৰ ওপৰত আক্ৰমণ কিয় কৰে। যিহেতু অটোইমিউন ৰোগৰ কোনো স্থায়ী চিকিৎসা নাই, এই গৱেষণা অতি উপকাৰী হ’ব পাৰে। ইয়াৰ ফলত ভৱিষ্যতে অটোইমিউন ৰোগৰ স্থায়ী চিকিৎসা বিচাৰি উলিওৱাত সহায়ক হ’ব পাৰে। এই বিজ্ঞানীসকলৰ গৱেষণাৰ ভিত্তিতে বহুতো অটোইমিউন ৰোগৰ চিকিৎসাও আৱিষ্কাৰ কৰা হৈছে।
পেৰিফেৰেল ইমিউন টলাৰেন্সে কেনেকৈ কাম কৰে?
জি টি বি হাস্পতালৰ মেডিচিন বিভাগৰ ডাঃ অজিত কুমাৰে কয় যে, পেৰিফেৰেল ইমিউন টলাৰেন্স হৈছে শৰীৰৰ এটা সুৰক্ষা প্ৰণালী, যিয়ে ইমিউন চিষ্টেমক নিজৰ কোষৰ ওপৰত আক্ৰমণ কৰাৰ পৰা ৰক্ষা কৰে। কিন্তু কিছুমান ক্ষেত্ৰত ই সঠিকভাৱে কাম নকৰে আৰু ইমিউন চিষ্টেমে নিজৰ কোষৰ ওপৰত আক্ৰমণ কৰিবলৈ আৰম্ভ কৰে।
ডাঃ কুমাৰৰ মতে, পেৰিফেৰেল টলাৰেন্স তিনিটা পদ্ধতিৰে কাম কৰে- এনাৰ্জী, ছাপ্ৰেছন আৰু এপ’পট’ছিছ। যদি কোনো টি-ছেলে শৰীৰৰ নিজৰ কোষ চিনাক্ত কৰে কিন্তু কোনো সংকেত নাপায়, তেন্তে ই নিষ্ক্ৰিয় হৈ পৰে। যদি পেৰিফেৰেল টলাৰেন্স সঠিকভাৱে কাম নকৰে, তেন্তে শৰীৰে নিজৰ টিছুক বাহিৰৰ শত্ৰু বুলি ভুল কৰে আৰু ইয়াৰ ফলত ৰোগ হয়। যেনে- ডায়েবেটিছত ইমিউন চিষ্টেমে পেঞ্চক্ৰিয়াছৰ কোষ ধ্বংস কৰে আৰু ৰিউমেটয়ড আৰ্থাৰাইটিছত শৰীৰে নিজৰ গাঁঠিৰ ওপৰত আক্ৰমণ কৰে।
ইমিউনিটি শক্তিশালী কৰাৰ সহজ উপায়:
– সুষম আহাৰ গ্ৰহণ কৰক আৰু খাদ্যত প্ৰ’টিন, সেউজীয়া শাক-পাচলি আৰু ঋতু অনুযায়ী ফল অন্তৰ্ভুক্ত কৰক।
– ভিটামিন-ডি আৰু ৰ’দ: প্ৰতিদিনে কিছু সময় ৰ’দত থাকক।
– প্ৰতিদিনে অন্ততঃ ৮ গিলাচ পানী পান কৰক।
– ৭ৰ পৰা ৮ ঘণ্টা টোপনি যাওক।
