চৰকাৰী ধনৰ অপব্যৱহাৰৰ অভিযোগত শ্ৰীলংকাৰ প্ৰাক্তন ৰাষ্ট্ৰপতি ৰনিল বিক্ৰমসিংঘেক শুকুৰবাৰে দেশখনৰ ফৌজদাৰী তদন্ত বিভাগে (ক্রিমিনেল ইনভেষ্টিগেশ্যন ডিপাৰ্টমেণ্ট, চমুকৈ CID) গ্রেপ্তাৰ কৰিছে।
৭৬ বছৰীয়া বিক্ৰমসিংঘেৰ পত্নী মৈত্ৰী বিক্ৰমসিংঘে এগৰাকী অধ্যাপিকা। অভিযোগ অনুসৰি, ২০২৩ চনৰ ছেপ্টেম্বৰত তেওঁৰ পত্নীৰ সমাৱৰ্তন অনুষ্ঠানত যোগ দিবলৈ ব্রিটেইনৰ এখন বিশ্ববিদ্যালয়লৈ গৈছিল। এই ভ্ৰমণত তেওঁ চৰকাৰী ধন খৰচ কৰিছিল বুলি অভিযোগ উত্থাপিত হৈছে।
প্ৰাথমিক তথ্য অনুসৰি, ২০২৩ চনৰ ছেপ্টেম্বৰত G77 বৈঠকত অংশগ্রহণৰ বাবে ৰনিল বিক্ৰমসিংঘে কিউবাৰ হাভানালৈ গৈছিল। তাৰ পৰা উভতি অহাৰ পথত তেওঁ লণ্ডনত ৰৈছিল আৰু পত্নীৰ সৈতে ব্রিটেইনৰ এখন বিশ্ববিদ্যালয়লৈ ব্যক্তিগত ভ্ৰমণ কৰিছিল। পূৰ্বে এই প্ৰবীণ ৰাজনীতিকজনে দাবী কৰিছিল যে, এই ব্যক্তিগত ভ্ৰমণৰ সকলো খৰচ তেওঁৰ পত্নীয়ে বহন কৰিছিল। কিন্তু CIDৰ দাবী, তদন্তত প্ৰকাশ পাইছে যে, এই ভ্ৰমণৰ বাবে চৰকাৰী ধন ব্যৱহাৰ কৰা হৈছিল। আনকি ব্রিটেইন ভ্ৰমণৰ সময়ত তেওঁৰ দেহৰক্ষীসকলৰ বেতনো চৰকাৰী কোষাগাৰৰ পৰা পৰিশোধ কৰা হৈছিল।
২০২২ চনৰ জুলাই মাহত গণবিক্ষোভৰ ফলত তৎকালীন ৰাষ্ট্ৰপতি গোতাবায়া ৰাজাপক্ষে পদত্যাগ কৰি দেশ এৰি পলায়ন কৰিছিল। তাৰ পিছত বিক্ৰমসিংঘেয়ে ৰাষ্ট্ৰপতিৰ পদ গ্রহণ কৰিছিল। ২০২৪ চনৰ নিৰ্বাচনত তেওঁ পুনৰ নিৰ্বাচিত হ’ব নোৱাৰিলে। তথাপিও, শ্ৰীলংকাৰ সংকটময় অৰ্থনৈতিক পৰিস্থিতি স্থিতিশীল কৰাৰ ক্ষেত্ৰত তেওঁক বহুতে কৃতিত্ব দিয়ে। ইউনাইটেড নেশ্যনেল পাৰ্টিৰ (ইউএনপি) এইজন নেতাই ৬বাৰ শ্ৰীলংকাৰ প্ৰধানমন্ত্রীৰ দায়িত্বও পালন কৰিছে।
CIDৰ এজন বিষয়াই সংবাদ সংস্থা AFPক জনোৱা মতে, বিক্ৰমসিংঘেক কলম্বো ফোৰ্ট মেজিষ্ট্ৰেটৰ সন্মুখত হাজিৰ কৰোৱা হ’ব। তথাপি, শ্ৰীলংকাৰ প্ৰাক্তন ৰাষ্ট্ৰপতিৰ সচিবালয়ৰ তৰফৰ পৰা এই বিষয়ে এতিয়ালৈকে কোনো প্ৰকাশ্য মন্তব্য কৰা হোৱা নাই। ৰয়টাৰ্ছৰ প্ৰশ্নৰ উত্তৰতো বিক্ৰমসিংঘেৰ সচিবালয়ৰ পৰা কোনো সঁহাৰি পোৱা নাই।
