অপাৰেচন সিন্দূৰৰ সময়ত ভাৰতৰ স্থানীয়ভাৱে নিৰ্মিত অস্ত্ৰ-শস্ত্ৰৰ সফলতাই বিশ্বৰ দৃষ্টি আকৰ্ষণ কৰিছে। আমেৰিকাৰ প্ৰাক্তন সেনা বিষয়া আৰু মডাৰ্ণ ৱাৰ ইনষ্টিটিউটৰ শীৰ্ষ বিশেষজ্ঞ জন স্পেন্সাৰে ভাৰতৰ ‘মেক-ইন-ইণ্ডিয়া’ পদক্ষেপৰ জৰিয়তে নিৰ্মিত প্ৰতিৰক্ষা ব্যৱস্থাৰ ভূয়সী প্ৰশংসা কৰিছে। তেওঁ কয় যে, ভাৰতৰ স্থানীয় অস্ত্ৰই যুদ্ধক্ষেত্ৰত নিজৰ ক্ষমতা প্ৰমাণ কৰিছে, আনহাতে পাকিস্তানৰ চীনা নিৰ্মিত অস্ত্ৰ-শস্ত্ৰই ব্যৰ্থ হৈছে।
স্পেন্সাৰে এক্সত লিখিছে, “২০১৪ চনত ভাৰতীয় সেনাৰ গোলাবাৰুদৰ প্ৰয়োজনৰ মাত্ৰ ৩২% স্থানীয়ভাৱে উৎপাদিত হৈছিল, কিন্তু ২০২৪ চনত এই সংখ্যা ৮৮%-ত উপনীত হৈছে।” ব্ৰহ্মোস, পিনাকা ক্ষেপণাস্ত্ৰ, ৰাডাৰ, আৰু কামানৰ দৰে ভাৰতীয় অস্ত্ৰই যুদ্ধত নিজৰ শ্ৰেষ্ঠত্ব প্ৰমাণ কৰিছে। তেওঁ ইয়াক কেৱল ভাৰতৰ জাতীয় সফলতা নহয়, বৰঞ্চ আধুনিক হুমকিৰ সন্মুখীন যিকোনো দেশৰ বাবে সামৰিক প্ৰস্তুতিৰ এক আদৰ্শ মডেল বুলি অভিহিত কৰিছে।
আনহাতে, পাকিস্তানে ব্যৱহাৰ কৰা চীনা নিৰ্মিত এইচকিউ-৯/পি, এলৱাই-৮০, আৰু এফএম-৯০ৰ দৰে প্ৰতিৰক্ষা ব্যৱস্থা ভাৰতৰ নিখুঁত আক্ৰমণ ৰোধ বা চিনাক্ত কৰিবলৈ ব্যৰ্থ হৈছে। স্পেন্সাৰে কয়, “প্ৰকৃত যুদ্ধত পাৰফৰ্মেঞ্চ ক্ৰয় চুক্তিতকৈ বেছি গুৰুত্বপূৰ্ণ।” পাকিস্তানৰ ব্যৰ্থ প্ৰতিশোধৰ পিছত ভাৰতৰ প্ৰতিৰক্ষা ব্যৱস্থাই দ্ৰুত প্ৰতিক্ৰিয়া জনাই লাহোৰ আৰু চক্ৰলাত পাকিস্তান সেনাৰ চীনা নিৰ্মিত প্ৰতিৰক্ষা ব্যৱস্থা ধ্বংস কৰিছিল।
ভাৰতৰ প্ৰতিৰক্ষা ব্যৱস্থা এতিয়া প্ৰযুক্তি নিৰ্ভৰ, যিয়ে হুমকি চিনাক্তকৰণ, বাধাদান, আৰু নিৰ্মূলত নিখুঁতভাৱে কাম কৰে। এছ-৪০০ ট্ৰাইউম্ফ, বাৰাক-৮, আকাশ ক্ষেপণাস্ত্ৰ, আৰু ড্ৰ’ন প্ৰতিৰোধী প্ৰযুক্তিৰ দৰে ব্যৱস্থাই ভাৰতৰ আকাশসীমাক অভেদ্য কৰি তুলিছে। অপাৰেচন সিন্দূৰত ব্যৱহৃত স্থানীয়ভাৱে নিৰ্মিত লইটাৰিং মিউনিচন (ড্ৰ’ন)ৰ সফলতাই ভাৰতৰ ক্ষমতাৰ প্ৰযুক্তিগত উৎকৰ্ষ প্ৰদৰ্শন কৰিছে।
এই সফলতাই ভাৰতৰ ‘আত্মনিৰ্ভৰ ভাৰত’ আৰু ‘মেক-ইন-ইণ্ডিয়া’ পদক্ষেপৰ শক্তি প্ৰমাণ কৰিছে। বিশ্বৰ দৃষ্টিত ভাৰত এতিয়া কেৱল এক শক্তিশালী সামৰিক শক্তি নহয়, বৰঞ্চ সামৰিক প্ৰস্তুতিৰ এক আদৰ্শ উদাহৰণ হৈ উঠিছে।
