ৰাকেশ টিকেইট, দেশজুৰি চৰ্চিত এক নাম। দেশৰ অন্নদাতা কৃষকসকলক একত্ৰিত কৰি মোদী চৰকাৰৰ বিৰুদ্ধে ধাৰাবাহিক আন্দোলনৰ গুৰি ধৰিছিল এইগৰাকী কৃষক নেতাই। ৰাকেশৰ নেতৃত্বতে কৃষকৰ ওচৰত সেও মানি ৩ কৃষি আইন প্ৰত্যাহাৰ কৰিছিল মোদী চৰকাৰে। সেইগৰাকী ৰাকেশ টিকেইটক হত্যাৰ ভাবুকি দিছে। ভাৰতীয় কিষাণ ইউনিয়নৰ ৰাষ্ট্ৰীয় মুখপাত্ৰগৰাকীক এজন অচিনাক্ত ব্যক্তিয়ে ফোনযোগে মৃত্যুৰ ভাবুকি দিছে। ফোনযোগে অশ্ৰাব্য গালি-গালাজ আৰু হত্যাৰ ভাবুকিৰ পিছতে আৰক্ষীয়ে ৰাকেশৰ বাসগৃহত উপস্থিত হৈ তদন্ত আৰম্ভ কৰিছে। মুজাফ্ফৰনগৰ আৰক্ষীয়ে এই ভাবুকিৰ আঁৰত এতিয়াও স্পষ্ট কৰা নাই যদিও অনুসন্ধান অব্যাহত ৰাখিছে।
