সাময়িক সকাহ! ৰুছিয়াৰ সামৰিক আগ্ৰাসনৰ পৰা কিছু সকাহ পালে ইউক্ৰেইনে। ৰুছিয়াৰ প্ৰতিৰক্ষা মন্ত্ৰালয়ে শনিবাৰে যুদ্ধবিৰতি ঘোষণা কৰে যাতে মাৰিয়পোলৰ কৌশলগত বন্দৰ চহৰকে ধৰি দুখন অৱৰোধ কৰা চহৰৰ বাসিন্দাসকলক স্থানান্তৰিত কৰিব পৰা যায়।
মন্ত্ৰালয়ে কয়, “আজি ৫ মাৰ্চ তাৰিখে মস্কোৰ সময় মতে পুৱা ১০ বজাৰ পৰা ৰুছিয়াৰ পক্ষই যুদ্ধ বিৰতিত আছে আৰু মাৰিয়পোল, ভলনোভাকাৰ পৰা অসামৰিক লোকৰ প্ৰস্থানৰ বাবে মানৱীয় ক’ৰিডৰ মুকলি কৰে।”
ভাৰতে শুকুৰবাৰে ৰুছিয়া আৰু ইউক্ৰেইনক সংঘৰ্ষক্ষেত্ৰত যুদ্ধবিৰতি ঘোষণা কৰিবলৈ আহ্বান জনায় যাতে দেশখনে প্ৰায় ৩,০০০ ভাৰতীয় নাগৰিকক উলিয়াই আনিব পাৰে, বিশেষকৈ ইউক্ৰেইনৰ পূব চহৰ খাৰকিভ আৰু চুমিৰ পৰা, য’ত গোলাবর্ষণ আৰু তীব্ৰ যুঁজৰ বাবে চলাচল অসম্ভৱ।
