উত্তৰ কোৰিয়াৰ শাসক কিম জং উন কঠোৰ নীতি আৰু মনোভাৱৰ বাবে পৰিচিত। পোহৰলৈ আহিছে কিমৰ এক নতুন খবৰ। কিম জং উনে এটা কাৰখানা প্ৰকল্পৰ বাবে অনুষ্ঠিত হোৱা এক অনুষ্ঠানত অংশ লৈছিল য’ত তেওঁ কিছু ভুল লক্ষ্য কৰিছিল। ইয়াৰ ফলত কিমে ইমানেই ক্ষুব্ধ হৈছিল যে উপ-প্ৰধানমন্ত্ৰী ইয়াং ছুং-হোক ঠাইতে বৰ্খাস্ত কৰিছিল। কিমে কয় যে, একাংশ বিষয়াৰ ভুলৰ বাবেই এই অৰ্থনৈতিক লোকচান হৈছে। উত্তৰ কোৰিয়াই ইতিমধ্যে নিজৰ অৰ্থনীতিৰ ক্ষেত্ৰত অসংখ্য প্ৰত্যাহ্বানৰ সন্মুখীন হৈছে, যিয়ে কিমৰ ক্ষোভক ইন্ধন যোগাইছিল।
উত্তৰ কোৰিয়াৰ চৰকাৰী সংবাদ সংস্থা কেচিএনএৰ মতে, ৰেনছান মেচিন-বিল্ডিং এছ’চিয়েশ্যনৰ পুনৰ্গঠন আৰু আধুনিকীকৰণৰ প্ৰথম পৰ্যায়ৰ কাম সম্পূৰ্ণ হোৱাৰ উপলক্ষে অনুষ্ঠিত হোৱা এক অনুষ্ঠানত কিম জং উনে উপ-প্ৰধানমন্ত্ৰী ইয়াং চেউং-হোক পদৰ পৰা অপসাৰণ কৰে। প্ৰতিবেদন অনুসৰি কিম জং উনে উল্লেখ কৰিছে যে, আধুনিকীকৰণৰ প্ৰথম পৰ্যায়ত দায়িত্বহীন আৰু অযোগ্য বিষয়াসকলে অপ্ৰয়োজনীয় কৃত্ৰিম বিশৃংখলতাৰ সৃষ্টি কৰিছিল, যাৰ ফলত অসুবিধা আৰু যথেষ্ট অৰ্থনৈতিক ক্ষতি হৈছিল।
কিমে কয় যে, একাংশ বিষয়াই দেশৰ উদ্যোগ সৰল কৰি প্ৰযুক্তি সংস্কাৰ সাধন কৰিবলৈ অনিচ্ছুক। অনুষ্ঠানৰ সময়ত কিমে উপ-প্ৰধানমন্ত্ৰীৰ ওপৰত তীব্ৰ আক্ৰমণ চলায়। তেওঁ ইয়াঙক উল্লেখযোগ্য দায়িত্ব চম্ভালিব পৰা দক্ষতাৰ অভাৱ বুলি অভিহিত কৰে। তেওঁ কয় যে, সহজ ভাষাত ক’বলৈ গ’লে ছাগলী এটাক গাড়ীত বান্ধি ৰখাৰ দৰেই আছিল—আমাৰ কেডাৰ নিযুক্তি প্ৰক্ৰিয়াৰ ভুল আছিল। কিমে আৰু ক’লে, “গাড়ীখন ছাগলী নহয়, ম’হে টানে।”
পাৰমাণৱিক অস্ত্ৰধাৰী উত্তৰ কোৰিয়াই অস্ত্ৰ কাৰ্যসূচীক লৈ অসংখ্য নিষেধাজ্ঞাৰ সন্মুখীন হৈছে। ইয়াৰ ফলত ৰাষ্ট্ৰ নিয়ন্ত্ৰিত অৰ্থনীতি দীৰ্ঘদিনীয়া দুৰ্বল আৰু খাদ্যৰ ধাৰাবাহিক নাটনিৰ সৃষ্টি হৈছে। এই কাৰণেই কিমে অৰ্থনৈতিক নীতিৰ ক্ষেত্ৰত কঠোৰ পন্থা বজাই ৰাখিছে। দৰিদ্ৰতাত আক্ৰান্ত উত্তৰ কোৰিয়াই দীৰ্ঘদিন ধৰি নিজৰ জনসাধাৰণৰ প্ৰয়োজনীয়তাতকৈ সামৰিক বাহিনী আৰু নিষিদ্ধ পাৰমাণৱিক অস্ত্ৰ কাৰ্যসূচীক অগ্ৰাধিকাৰ দি আহিছে।
অৱশ্যে, কিমে এই কথাও উল্লেখ কৰে যে উপ-প্ৰধানমন্ত্ৰীৰ এই কাৰ্য দলবিৰোধী নহয়, বৰঞ্চ প্ৰশাসনিক ভুলহে।
কিম জং উনে উল্লেখ কৰে যে, সমৃদ্ধি আৰু উন্নয়নৰ দিশত আগবাঢ়ি যোৱা আজিৰ উত্তৰ কোৰিয়াক এনে কৰ্মীৰ প্ৰয়োজন, যাৰ কামে দেশখনক উজ্জ্বল ভৱিষ্যতৰ দিশলৈ লৈ যাব। তেওঁ জ্যেষ্ঠ বিষয়াসকলক দলৰ আধুনিকীকৰণ নীতিৰ প্ৰয়োজনীয়তাসমূহ পুনৰ মূল্যায়ন কৰিবলৈ আৰু স্পষ্ট পৰিকল্পনা আৰু বৈজ্ঞানিক পদ্ধতিৰ ওপৰত ভিত্তি কৰি আধুনিক আৰু উন্নত অৰ্থনীতি গঢ়ি তুলিবলৈ আহ্বান জনায়, যিয়ে দেশৰ ভৱিষ্যতৰ বাবে এক শক্তিশালী নিশ্চয়তা প্ৰদান কৰে।
কিম জং উনে লগতে কয় যে, বৰ্তমানৰ সময়ছোৱাত যেতিয়া ৰাষ্ট্ৰীয় অৰ্থনীতি সুস্থিৰ হোৱাৰ পথত আগবাঢ়িছে আৰু আঞ্চলিক উন্নয়ন নীতি দ্ৰুতগতিত আগবাঢ়িছে, তেতিয়া যন্ত্ৰপাতিৰ চাহিদা বৃদ্ধি পাইছে। ইয়াৰ বাবে নিৰন্তৰ বৈজ্ঞানিক আৰু প্ৰযুক্তিগত গৱেষণা আৰু মানৱ সম্পদ শক্তিশালী কৰাৰ প্ৰয়োজন।
ক’ভিড-১৯ মহামাৰীৰ সময়ত উত্তৰ কোৰিয়াৰ অৰ্থনীতিত যথেষ্ট আঘাত হানিছিল। দক্ষিণ কোৰিয়াৰ কেন্দ্ৰীয় বেংকৰ তথ্য অনুসৰি ২০২৪ চনত উত্তৰ কোৰিয়াৰ অৰ্থনীতি ৩.৭ শতাংশ বৃদ্ধি পাইছে। কিন্তু বহু বিশেষজ্ঞৰ মতে উত্তৰ কোৰিয়াই অস্ত্ৰ-শস্ত্ৰৰ ক্ষেত্ৰত যথেষ্ট ব্যয় কৰাৰ বাবে দ্ৰুত আৰু বৃহৎ পৰিসৰৰ অৰ্থনৈতিক বিকাশ সাধন কৰাটো কঠিন হ’ব। ইয়াৰ উপৰিও ইয়াৰ ওপৰত আন্তঃৰাষ্ট্ৰীয় নিষেধাজ্ঞা অব্যাহত আছে।
