‘কাণ্টে’, ‘শ্বুটআউট এট লোখাণ্ডৱালা’ আৰু ‘কাবিল’ৰ দৰে জনপ্ৰিয় ছবিৰ পৰিচালক সঞ্জয় গুপ্তাৰ দেহাৱসান। ২০২৬ চনৰ ৩০ অক্টোবৰত শেষ নিশ্বাস ত্যাগ কৰে চলচ্চিত্ৰ পৰিচালকগৰাকীয়ে। তথ্য অনুসৰি, মৃত্যুৰ সময়ত তেওঁৰ বয়স আছিল ৫৭ বছৰ।
জানিব পৰা মতে, দিনৰ প্ৰায় ২.৩০ বজাত নিজৰ পাকঘৰত পৰি গৈ মূৰত আঘাত পাইছিল সঞ্জয় গুপ্তাই। সেই সময়ত ঘৰত তেওঁৰ পত্নী আৰু দুই পুত্ৰও উপস্থিত আছিল। কিন্তু প্ৰথম অৱস্থাত পৰিয়ালৰ কোনো লোকেই ঘটনাটো সম্পৰ্কে অৱগত হোৱা নাছিল। অৱশ্যে এই দুৰ্ঘটনাৰ প্ৰকৃত কাৰণ এতিয়াও স্পষ্ট হোৱা নাই।
সঞ্জয় গুপ্তাৰ মৃত্যুৰ লগে লগে কেইবা দশকজোৰা চলচ্চিত্ৰ পৰিচালনাৰ এক অধ্যায়ৰ পৰিসমাপ্তি ঘটিল। বিশেষকৈ অভিনেতা সঞ্জয় দত্তৰ সৈতে তেওঁৰ আছিল কেইবাখনো সফল ছবিৰ সহযোগিতা। দুয়ো একেলগে ‘কাণ্টে’ (২০০২), ‘মুছাফিৰ’ (২০০৪), ‘জিন্দা’ (২০০৬) আৰু ‘শ্বুটআউট এট লোখাণ্ডৱালা’ (২০০৭)ৰ দৰে ছবিত কাম কৰিছিল।
উল্লেখ্য যে, ১৯৯১ চনত সংঘটিত লোখাণ্ডৱালা কমপ্লেক্সৰ গুলীচালনাৰ ঘটনাৰ আধাৰত নিৰ্মাণ কৰা হৈছিল ‘শ্বুটআউট এট লোখাণ্ডৱালা’। ছবিখনৰ পৰিচালনাৰ লগতে প্ৰযোজনা আৰু চিত্ৰনাট্য ৰচনাৰ সৈতেও জড়িত আছিল সঞ্জয় গুপ্ত। পৰৱৰ্তী সময়ত ২০১৩ চনত বাস্তৱ ঘটনাৰ আধাৰত নিৰ্মিত ‘শ্বুটআউট এট ৱাডালা’ৰ জৰিয়তে পুনৰ অপৰাধমূলক কাহিনীৰ ছবিৰ জগতলৈ উভতি আহিছিল তেওঁ।
অপৰাধমূলক কাহিনীৰ ছবিৰ উপৰি বিভিন্ন ধৰণৰ বিষয়বস্তুৰ ছবিও নিৰ্মাণ কৰিছিল সঞ্জয় গুপ্তাই। ঐশ্বৰ্য ৰায় বচ্চন অভিনীত ‘জজবা’ (২০১৫) আৰু হৃত্বিক ৰোশন তথা য়ামী গৌতম অভিনীত ‘কাবিল’ (২০১৭) তেওঁৰ উল্লেখযোগ্য ছবি। ইয়াৰ উপৰি ‘দছ কাহানিয়া’ (২০০৭), ‘এচিড ফেক্টৰী’ (২০০৯) আৰু জন আব্ৰাহাম তথা ইমৰান হাশমী অভিনীত ‘মুম্বাই ছাগা’ (২০২১) ছবিকেইখনো তেওঁৰ পৰিচালনাৰ অন্যতম সৃষ্টি।
পৰিচালনাৰ সমান্তৰালভাৱে প্ৰযোজক হিচাপেও নিজৰ পৰিচয় গঢ়ি তুলিছিল সঞ্জয় গুপ্তই। ২০০১ চনত তেওঁ ‘হোৱাইট ফেদাৰ ফিল্মছ’ নামৰ নিজা প্ৰযোজনা সংস্থা প্ৰতিষ্ঠা কৰিছিল। এই প্ৰযোজনা সংস্থাৰ অধীনত পৰৱৰ্তী সময়ত কেইবাখনো ছবি নিৰ্মাণ কৰা হৈছিল।
তেওঁৰ শেহতীয়া ছবিসমূহৰ ভিতৰত আছিল ২০২৪ চনত মুক্তিপ্ৰাপ্ত ‘দ্য মিৰাণ্ডা ব্ৰাদাৰ্ছ’, য’ত অভিনয় কৰিছিল মীজান জাফৰী আৰু হৰ্ষবৰ্ধন ৰাণেই। একে বছৰতে মুক্তি পোৱা ‘ভিস্ফোট’ ছবিখনত অভিনয় কৰিছিল ৰিতেশ দেশমুখ আৰু ফাৰদিন খানে।
চলচ্চিত্ৰ পৰিচালক হিচাপে প্ৰতিষ্ঠা লাভ কৰাৰ পূৰ্বে সঞ্জয় গুপ্তাই পোষ্ট-প্ৰডাকচন আৰু ছাউণ্ড ডিজাইনৰ ক্ষেত্ৰতো কাম কৰিছিল। ইয়াৰ উপৰি পৰিচালক পংকজ পৰাশৰৰ সহকাৰী হিচাপে ‘কৰমচান্দ’ নামৰ টেলিভিছন ধাৰাবাহিক আৰু ‘জলৱা’ ছবিৰ সৈতেও জড়িত আছিল তেওঁ।
নিজৰ সমগ্ৰ চলচ্চিত্ৰ জীৱনত এক সুকীয়া পৰিচালনা শৈলী গঢ়ি তুলিছিল সঞ্জয় গুপ্তই। বিশেষকৈ শৈলীবদ্ধ একচন দৃশ্য, অপৰাধমূলক কাহিনী আৰু নগৰীয়া পৰিৱেশৰ উপস্থাপনেৰে হিন্দী চলচ্চিত্ৰ জগতত এক সুকীয়া পৰিচিতি লাভ কৰিছিল তেওঁ। তেওঁৰ মৃত্যুত হিন্দী চলচ্চিত্ৰ জগতৰ এক পৰিচিত অধ্যায়ৰ অৱসান ঘটিল।
