বিশ্ববিদ্যালয় অনুদান আয়োগে গ্ৰহণ কৰিছে কঠোৰ পদক্ষেপ। ৰাজস্থানৰ ৩খন বিশ্ববিদ্যালয় ক্ৰমে চুৰুৰ অ’ পি জে এছ ইউনিভাৰ্চিটি, আলৱাৰৰ ছানৰাইজ ইউনিভাৰ্চিটি আৰু ঝুনঝুনুৰ সিংহানিয়া বিশ্ববিদ্যালয়ত ডক্টৰেট ডিগ্ৰীত নামভৰ্তিত নিষেধাজ্ঞা। ২০২৫-২৬ শিক্ষাবৰ্ষৰ পৰা ২০২৯-৩০ শিক্ষা বৰ্ষলৈকে নামভৰ্তিত নিষেধাজ্ঞা আৰোপ কৰিছে বিশ্ববিদ্যালয় অনুদান আয়োগে। বিশ্ববিদ্যালয় অনুদান আয়োগৰ পিএইচডিৰ বিধান মানি চলাত ব্যৰ্থ হোৱাৰ বাবেই এই কঠোৰ সিদ্ধান্ত গ্ৰহণ কৰা হৈছে।
আনুষ্ঠানিক অধিসূচনা অনুসৰি আয়োগে ইউজিচিৰ নিয়ম অনুসৰি বিশ্ববিদ্যালয়সমূহে এই পদ্ধতি অনুসৰণ কৰি পি এইচ ডি ডিগ্ৰী প্ৰদান কৰিছে নে নাই তাক নিৰীক্ষণ কৰিবলৈ এখন স্থায়ী সমিতি গঠন কৰিছিল। বিশ্ববিদ্যালয়সমূহে দাখিল কৰা তথ্য/তথ্যসমূহ বিশ্লেষণ/পৰ্যবেক্ষণ/মূল্যায়ন কৰাৰ পিছত স্থায়ী সমিতিখনে লক্ষ্য কৰে যে তিনিখন বিশ্ববিদ্যালয়ে ইউজিচিৰ পিএইচডি নিয়মাৱলীৰ বিধান আৰু পিএইচডি ডিগ্ৰী প্ৰদানৰ শৈক্ষিক মাপকাঠী মানি চলা নাছিল।
আয়োগে এই বিশ্ববিদ্যালয়সমূহক ইউজিচিৰ পিএইচডি নিয়মাৱলীৰ বিধানসমূহ কিয় মানি চলাত ব্যৰ্থ হৈছে সেই বিষয়ে বুজাবলৈ সুযোগ দিছিল। এই বিশ্ববিদ্যালয়সমূহৰ পৰা পোৱা উত্তৰ ইউজিচিৰ বাবে সন্তোষজনক নাছিল। সেয়েহে আয়োগে এই বিশ্ববিদ্যালয়সমূহক অহা পাঁচ বছৰৰ বাবে পি এইচ ডি ছাত্ৰ-ছাত্ৰীক নামভৰ্তি কৰাত বাধা বা নিষেধাজ্ঞা প্ৰদান কৰিছে।
