এখন দলং সাজিবলৈ এটা বিভাগক কিমান বছৰ লাগে? এখন দলং সাজিম বুলি ভাবিবলৈ এটা বিভাগক কিমান দিন লাগে? কিমান দুৰ্ভোগ ভুগিলে স্থানীয় বিধায়কৰ চকু খোলে? নগৰবেৰাৰ ২ নং টুপামাৰীত বিপজ্জনকভাৱে চলিছে যাতায়াত। মাত্ৰ দুডাল বাঁহতে মৰণক শৰণ দি এই যাত্ৰা। কণ কণ শিশুৱে শিক্ষাৰ পোহৰ বিচাৰি এইদৰেই কৰে অহা যোৱা। পিঠিত কিতাপৰ বেগ লৈ মৰণত শৰণ দি যাত্ৰা। কাঠৰ ভগা দলংখনৰ খুঁটাকেইটাতে বন্ধা আছে বাঁহ। এয়া ২০২৪ চনৰ বিকশিত অসমৰ এখন জীয়া ছবি। ৰাইজ নিৰাশ। স্থানীয় বিধায়কৰ খবৰ নাই।
স্থানীয় যুৱকৰ তৎপৰতাত বন্ধা গৈছিল বাঁহকেইডাল। বছৰৰ হিচাপত বহুতেই গ’ল। বিভাগীয় কৰ্তৃপক্ষৰ খবৰ নহ’ল। এইদৰে নিতৌ যাতায়াত কৰি অসহায় জনতা। ক’লে আমাক এখন দলং লাগে।
চৰকাৰৰ সংশ্লিষ্ট বিভাগ তথা স্থানীয় বিধায়কক আবেদন নিবেদন জনাইও সুফল নাপালে গাঁওবাসীয়ে। হাট–বজাৰ, স্কুল, কলেজ এই বাটেৰেই। ৰাইজৰ দুৰ্ভোগ যাতনাৰ ছবি তুলি ধৰিছে আমাৰ সাংবাদিকে। লক্ষণীয় হ’ব বিয়াগোম বিভাগ আৰু স্থানীয় বিধায়কৰ ‘গান্ধাৰী বান্ধ’ কেতিয়া খোলে!
