ছত্তীশগড়ত নিৰাপত্তা বাহিনীৰ গুলীত মৃত্যু হ’ল মাওবাদী নেতা নৰ সিংহচলম ওৰফে সুধাকৰৰ। বৃহস্পতিবাৰে ছত্তীশগড়ৰ বিজাপুৰৰ জাতীয় উদ্যানত নিৰাপত্তা বাহিনীয়ে এক অভিযান চলায়। সেই অভিযানতে মাওবাদীৰ অন্যতম শীৰ্ষ নেতা সুধাকৰৰ মৃত্যু হয়। তেওঁ মাওবাদী সংগঠনৰ কেন্দ্ৰীয় সমিতিৰ সদস্য আছিল। সুধাকৰৰ মূৰৰ মূল্য আছিল ৪০ লাখ টকা।
সুধাকৰ তেলেঙ্গানা, ছত্তীশগড় আৰু মহাৰাষ্ট্ৰত সক্ৰিয় আছিল। বহুদিন ধৰি নিৰাপত্তা বাহিনীয়ে তেওঁৰ সন্ধানত আছিল। গোপন সূত্ৰৰ পৰা খবৰ পাই বৃহস্পতিবাৰে পুৱা বিজাপুৰৰ জংঘলত জিলা সংৰক্ষিত গাৰ্ড (ডিআৰজি) আৰু বিশেষ কাৰ্যবাহী বাহিনী (এছটিএফ)য়ে অভিযান আৰম্ভ কৰে। কেন্দ্ৰীয় বাহিনী চিআৰপিএফৰ জংঘল যুদ্ধৰ প্ৰশিক্ষণপ্ৰাপ্ত কমাণ্ডো বাহিনী ‘কোবৰা’ও এই অভিযানত আছিল। জংঘলত অভিযানৰ সময়ত নিৰাপত্তা বাহিনীৰ সৈতে মাওবাদীৰ গুলীচালনা আৰম্ভ হয়। মৃত মাওবাদী নেতাজনৰ নাম এতিয়ালৈকে চৰকাৰীভাৱে ঘোষণা কৰা হোৱা নাই। কিন্তু বিভিন্ন সংবাদ মাধ্যমত দাবী কৰা হৈছে যে বিজাপুৰৰ এই অভিযানত মাওবাদীৰ কেন্দ্ৰীয় সমিতিৰ সদস্য সুধাকৰৰ মৃত্যু হৈছে।
যোৱা মাহত আন এজন শীৰ্ষ মাওবাদী নেতা তথা চিপিআই (মাওবাদী)ৰ সাধাৰণ সম্পাদক নাম্বালা কেশৱ ৰাও ওৰফে বাসৱৰাজুৰ মৃত্যু হৈছিল নিৰাপত্তা বাহিনীৰ অভিযানত। তেওঁৰ মূৰৰ মূল্য আছিল ১ কোটি টকা। ছত্তীশগড়ৰ নাৰায়ণপুৰৰ অবুঝমাঢ়ত নিৰাপত্তা বাহিনীৰ সৈতে গুলীচালনাত তেওঁ নিহত হয়। সেই অভিযানত বাসৱৰাজুৰ লগতে আৰু ২৯জন মাওবাদীৰ মৃত্যু হৈছিল।
মে’ মাহৰ সেই অভিযানটো নিৰাপত্তা বাহিনীৰ বাবে অত্যন্ত গুৰুত্বপূৰ্ণ আছিল। কাৰণ, তিনি দশকৰ যুদ্ধত প্ৰথমবাৰৰ বাবে কোনো অভিযানত সাধাৰণ সম্পাদক পদমৰ্যাদাৰ মাওবাদী নেতাৰ মৃত্যু হৈছিল। তাৰ বাবে প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহে নিৰাপত্তা বাহিনীক অভিনন্দন জনাইছিল। যোৱা মাহত মাওবাদী দমন অভিযানত সেই সফলতাৰ পিছত বৃহস্পতিবাৰে আন এজন শীৰ্ষ মাওবাদী নেতাৰ মৃত্যু হ’ল নিৰাপত্তা বাহিনীৰ অভিযানত।
