সৰ্বাধিক পৱিত্ৰ বিষয়টোকেই বেয়া দৃষ্টিৰে চোৱা হয় বুলি দাবী কৰিছে অভিনেত্ৰী তামান্না ভাটিয়াই। পৰ্দাত তেওঁৰ ৰূপত মুগ্ধ হৈ পৰে অনুৰাগীসকল। তেওঁৰ শাৰীৰিক আকৰ্ষণে এক অনন্য আবেগৰ সৃষ্টি কৰে। ‘আজ কি ৰাত’ শীৰ্ষক গীতত নৃত্যৰ পিছত তেওঁ অনুৰাগীসকলৰ বাবে স্বপ্নসুন্দৰীত পৰিণত হৈছে। বাস্তৱ জীৱনত তামান্না অতি স্পষ্টবাদী। যিকোনো বিষয়ত মুকলিকৈ কথা ক’বলৈ তেওঁ ভাল পায়। সম্প্ৰতি এটা সাক্ষাৎকাৰত তামান্নাই যৌনতাৰ বিষয়ে কথা কৈছে।
অভিনেত্ৰী গৰাকীৰ মতে, পৃথিৱীৰ সৰ্বাধিক পৱিত্ৰ বিষয়টোকেই বেয়া দৃষ্টিৰে চোৱা হয়। তামান্নাই কয়, “যেতিয়া মানুহে আপোনাক নিয়ন্ত্ৰণ কৰিব নোৱাৰে, তেতিয়া তেওঁলোকে এটা অদ্ভুত পদ্ধতি গ্ৰহণ কৰে। তেওঁলোকে আপোনাক লজ্জিত আৰু দোষী অনুভৱ কৰোৱাৰ চেষ্টা কৰে। তেওঁলোকে সদায় এইটোৱে বিচাৰে যাতে আপুনি নিজৰ কামৰ বাবে লজ্জিত অনুভৱ কৰে।”
নিজৰ কামৰ বাবে লজ্জিত হোৱাটো সৰ্বাধিক ভুল বুলি ধাৰণা কৰে তামান্নাই। যৌনতাৰ বিষয়ে তেওঁ কয়, “যি মুহূৰ্তত কোনোবাই আপোনাক লজ্জিত অনুভৱ কৰাব পাৰে, সেই মুহূৰ্তত আপুনি তেওঁৰ নিয়ন্ত্ৰণলৈ আহে। কি অদ্ভুতভাৱে আমি সৰ্বাধিক পৱিত্ৰ বিষয়টোৰ বাবে লজ্জিত অনুভৱ কৰো। কাৰণ আমাক এনেকৈ ভাবিবলৈ শিকোৱা হৈছে। আমি ভাবো, কি বেয়া কামটো কৰিলো! কিন্তু এইটোতো জীৱনৰ এটা অংশ। এইটোৰ বাবেই আমাৰ আজি এই পৃথিৱীত অস্তিত্ব আছে।”
উল্লেখ্য যে, যোৱা বছৰ তামান্নাৰ ‘আজ কি ৰাত’ গীতটিয়ে অনুৰাগীসকলৰ মাজত তোলপাৰ লগাইছিল।
