শোচনীয় হৈ আহিছে ছিকিমৰ বান পৰিস্থিতি
ভয়াৱহ বান-খহনীয়াত যোগাযোগ বিচ্ছিন্ন হৈ ৰৈছে উত্তৰ ছিকিম
ভূস্খলনৰ ফলত এতিয়ালৈকে ৯ জন লোকৰ প্ৰাণহানি
ছিকিমত আৱদ্ধ হৈ ৰৈছে ২ সহস্ৰাধিক পৰ্যটক
বান-খহনীয়াই ভয়াৱহ পৰিস্থিতিৰ সৃষ্টি কৰিছে উত্তৰ ছিকিমত। বৰষুণ অব্যাহত ৰোৱাৰ ফলত নতুনকৈ সংঘটিত হৈছে কেইবাটাও ভূমিস্খলনৰ ঘটনা। বুধবাৰে ৩ জন লোকে প্ৰাণ হেৰুওৱাৰ পিছত নিশা আন ৬জন লোকৰ মৃত্যুৰ বাতৰি আহিছে। এই প্ৰলয়ত বিপৰ্যস্ত ৰাজ্যখনৰ মংগন জিলাত বুধবাৰৰ নিশাৰ পৰা বৃহস্পতিবাৰে পুৱালৈ প্ৰায় ২২০ মিলিমিটাৰ বৰষুণ হৈছে। অবিৰাম বৰষুণৰ ফলত বোকাই নতুনকৈ পুতি পেলাইছে ৰাজ্যখনৰ বিস্তীৰ্ণ অঞ্চল।
ৰাজ্যখনত ভূমিস্খলনত নিহত ৯জনৰ ভিতৰত ৩ জনৰ মৃত্যু দক্ষিণ ছিকিমত
ভূমিস্খলনত আক্ৰান্ত হৈছে দক্ষিণ ছিকিমৰ বিস্তীৰ্ণ এলেকাও
গেংটকৰ পৰা মংগনলৈ থকা পথ কেইবাটাও স্থানত হৈ পৰিছে বিচ্ছিন্ন
ছিকিম চৰকাৰে উদ্ধাৰ অভিযান আৰম্ভ কৰিছে যদিও বতৰৰ দুৰ্যোগৰ বাবে এই অভিযানত অসুবিধাৰ সৃষ্টি হৈছে। ইফালে অনাগত কেইদিনত বতৰ বিজ্ঞান বিভাগে অধিক পৰিমাণৰ বৰষুণ হ’ব বুলি সকীয়নি দিছে। ফলত বান-খহনীয়াই সৃষ্টি কৰা পৰিস্থিতি অধিক শোচনীয় হৈ পৰাৰ আশংকাই দেখা দিছে।
