নতুন দিল্লী, ৫ জুলাই : ভাৰতীয় বেডমিণ্টন সন্থা [বাই]ই আৰ ই চি লিমিটেড আৰু ভাৰতীয় ক্ৰীড়া প্ৰাধিকৰণ [ছাই]ৰ সহযোগত তৃণমূল পৰ্যায়ৰ প্ৰশিক্ষকক উপকৃত কৰাৰ লক্ষ্যৰে আয়োজন কৰা ৰাষ্ট্ৰীয় পৰ্যায়ৰ প্ৰশিক্ষক বিকাশ কাৰ্যসূচীৰ আজি সফলতাৰে সম্পন্ন হয়৷ যোৱা ২৫ জুনৰ পৰা আৰম্ভ হোৱা ১১ দিনীয়া এই প্ৰশিক্ষক বিকাশ কাৰ্যসূচীৰ আজি সামৰণি অনুষ্ঠানত বিশ্ব বেডমিণ্টন দিৱসো উদযাপন কৰা হয়৷
উল্লেখ্য যে অসমৰ গুৱাহাটীত থকা বাইৰ ৰাষ্ট্ৰীয় উৎকৃষ্টতা কেন্দ্ৰ [এন চি ই] আৰু ছত্তীশগড়ৰ ৰায়পুৰত একেলগে অনুষ্ঠিত হোৱা এই শিবিৰত ভাৰতৰ ২২ খন ৰাজ্যৰ মুঠ ৫৩ জন তৃণমূল পৰ্যায়ৰ প্ৰশিক্ষকে অংশগ্ৰহণ কৰি কৌশলগত দিশ তথা আধুনিক পদ্ধতিৰ প্ৰশিক্ষণ দিশবোৰ আয়ত্ব কৰে৷ আজি সামৰণি অনুষ্ঠানত মুখ্য অতিথি হিচাপে উপস্থিত থাকে আৰ ই চি ফাউণ্ডেশ্যনৰ কাৰ্যবাহী সঞ্চালক তৰুণা গুপ্তা৷ এই কৌশলগত পদক্ষেপে প্ৰশিক্ষকৰ অনুশীলনত নতুনত্ব অনাৰ লগতে দেশৰ সম্ভাৱ্য নতুন বেডমিণ্টন তাৰকাসকক এক শক্তিশালী আৰম্ভনি দিব বুলি আশা কৰা হৈছে৷
শিবিৰ সম্পৰ্কত ভাৰতীয় বেডমিণ্টন সন্থাৰ সাধাৰণ সম্পাদক সঞ্জয় মিশ্ৰই কয় ‘প্ৰাথমিক পৰ্যায়ত প্ৰতিভা চিনাক্তকৰণ আৰু বিকাশ কৰাত তৃণমূল পৰ্যায়ৰ প্ৰশিক্ষকে গুৰুত্বপূৰ্ণ ভূমিকা পালন কৰে৷ এই কাৰ্যসূচীয়ে তেওঁলোকক সম্ভাৱ্য তাৰকা চিনাক্ত কৰিবলৈ আৰু তেওঁলোকৰ বিকাশৰ ভেটি স্থাপন কৰিবলৈ নতুন কৌশল তথা মানসিক উৎকৰ্ষ সাধন কৰিব৷ আমাৰ এই পদক্ষেপত আৰ ই চি আৰু ছাইয়ে সহায় কৰাৰ বাবে আমি ধন্যবাদ জনাইছো৷’
উল্লেখ্য যে ভাৰতীয় বেডমিণ্টন সন্থাই যোৱা মাৰ্চ মাহৰ আৰম্ভণিতে দেশৰ চাৰিখন চহৰ ক্ৰমে বেংগালুৰু, হায়দৰাবাদ, ৰায়পুৰ আৰু গুৱাহাটীত একেলগে একেধৰণৰ কাৰ্যসূচী অনুষ্ঠিত কৰিছিল৷ এই শিবিৰত ভাৰতৰ কেবাজনো প্ৰাক্তন খেলুৱৈকে ধৰি প্ৰায় এশ গৰাকী নতুন প্ৰশিক্ষকে অংশগ্ৰহণ কৰিছিল৷ অংশগ্ৰহণকাৰী প্ৰশিক্ষকসকলে তেওঁলোকৰ মতামত দিয়াৰ পাছতে বাই, ছাই আৰু আৰ ই চিয়ে একলগ হৈ এই কাৰ্যসূচী ব্যাপক ৰূপত সমগ্ৰ দেশতে সম্প্ৰসাৰিত কৰাৰ লক্ষ্য লয়৷
