দক্ষিণ কামৰূপৰ ছয়গাঁৱত সংঘটিত হৈছে এক চাঞ্চল্যকৰ ঘটনা। চাৰি বন্ধুৰ হাতত প্ৰাণ গ’ল এজন যুৱকৰ। মৃত যুৱকজনৰ নাম গৌতম কলিতা। ছয়গাঁৱৰ বালাগাঁৱত সংঘটিত হৈছে এই ঘটনা। ২৬ মে’ত বালাগাঁও দুৰ্গা মন্দিৰৰ সন্মুখত সংঘটিত হয় এই ঘটনা। অভিযুক্ত চাৰি বন্ধু ক্ৰমে ধীৰাজ শৰ্মা, ভৱ দাস, ধীৰেণ ৰাজবংশী আৰু কংকণ কলিতা। অত্যধিক মদ্যপান কৰি তৰ্কা-তৰ্কিত লিপ্ত হৈছিল যুৱক কেইজন। তাৰ পাছতেই ধীৰাজ শৰ্মাই নিজৰ ই-ৰিক্সাৰে গৌতম কলিতাক খুন্দিয়াই। যাৰ ফলত ঘটনাস্থলীতে অচেতন হৈ পৰে গৌতম কলিতা। ছয়গাঁও প্ৰাথমিক স্বাস্থ্য কেন্দ্ৰলৈ বন্ধু কেইজনে গৌতমক লৈ যায় যদিও চিকিৎসকে মৃত ঘোষণা কৰে। ইপিনে সমগ্ৰ ঘটনাক চাৰি বন্ধুৱে আৰক্ষীক স্বাভাৱিক মৃত্যু বুলি ভুল পথে পৰিচালিত কৰিছিল। ছয়গাঁও আৰক্ষীৰ তদন্ততহে পোহৰলৈ আহে প্ৰকৃত ৰহস্য। বৃহস্পতিবাৰে নিশাই চাৰি বন্ধুক আটক কৰে আৰক্ষীয়ে। তিনিবছৰীয়া কন্যা সন্তানক কোলাত লৈ স্বামীৰ হত্যাকাৰীক উচিত শাস্তিৰ দাবী পত্নীৰ।
