বাংলাদেশৰ আন্তঃৰাষ্ট্ৰীয় ন্যায়াধিকৰণ আদালতে পদচ্যুত প্ৰধানমন্ত্ৰী শ্বেখ হাছিনাক মৃত্যুদণ্ডৰ শাস্তি প্ৰদান কৰিছে যদিও চৰকাৰৰ হাতত মহিলাক ফাঁচী দিয়াৰ ঠাইৰ অভাৱ। এই কথা প্ৰকাশ পাইছে বাংলাদেশৰ সংবাদ মাধ্যমৰ এক প্ৰতিবেদনত।
স্থানীয় কালেৰ কথা কাকতখনৰ তথ্য অনুসৰি ১৯৭১ চনৰ পৰা ১০০ৰো অধিক মহিলাক মৃত্যুদণ্ডৰ শাস্তি প্ৰদান কৰা হৈছে যদিও কোনো এগৰাকীৰ ক্ষেত্ৰতো কাৰ্যকৰী কৰা হোৱা নাই। বৰ্তমান ৯৪ গৰাকী মহিলা কয়দীয়ে ফাঁচীৰ বাবে অপেক্ষা কৰি আছে।
বাতৰি কাকতখনৰ মতে গাজীপুৰত মহিলাৰ বাবে সুকীয়া কাৰাগাৰ নিৰ্মাণ কৰা হৈছে যদিও তাত কোনো ফাঁচীৰ ব্যৱস্থা নাই। গাজীপুৰ কাৰাগাৰত ফাঁচীৰ ব্যৱস্থা কিয় কৰা নহ’ল সেই প্ৰশ্নৰ উত্তৰত কাৰাগাৰৰ প্ৰাক্তন মহাপৰিদৰ্শক ব্ৰিগেডিয়াৰ জাকিৰ হাছানে কয় যে, ইয়াৰ পূৰ্বে কোনো মহিলাক ফাঁচী দিয়া হোৱা নাছিল।
বাংলাদেশত বেছিভাগ মৃত্যুদণ্ড ৰাষ্ট্ৰপতিৰ ওচৰ পোৱাৰ সময়লৈকে যাৱজ্জীৱন কাৰাদণ্ডলৈ হ্ৰাস কৰা হয়। বাংলাদেশত মৃত্যুদণ্ডৰ অৰ্থ হ’ল ফাঁচী।
বাংলাদেশত মৃত্যুদণ্ডৰ ব্যৱস্থা মাত্ৰ এটা পদ্ধতিৰে কৰিব পাৰি, সেইটো হ’ল ফাঁচী। ১৮৯৮চনৰ ফৌজদাৰী বিধি আইন অনুসৰি মৃত্যুদণ্ডৰ শাস্তি পোৱা ব্যক্তিক ফাঁচী দিয়া হয়। বাংলাদেশত গুলীচালনা, বিদ্যুৎস্পৃষ্ট, বা মাৰাত্মক বেজীৰে মৃত্যুদণ্ড আন মুছলমান দেশৰ দৰে কৰা নহয়।
শ্বেখ হাছিনাক ভাৰতৰ পৰা ঘূৰাই অনাৰ প্ৰস্তুতি
আন্তঃৰাষ্ট্ৰীয় ন্যায়াধিকৰণ আদালতৰ সিদ্ধান্তৰ পিছতে বাংলাদেশ চৰকাৰৰ প্ৰথম প্ৰচেষ্টা হৈছে শ্বেখ হাছিনাক ঢাকালৈ ঘূৰাই অনা। বৰ্তমান ভাৰতৰ ৰাজধানী দিল্লীত আছে শ্বেখ হাছিনা। বাংলাদেশ চৰকাৰেও ভাৰতলৈ এখন চিঠি লিখিছে।
বাংলাদেশ চৰকাৰে অনাগত দিনত ইন্টাৰপল ৱাৰেণ্ট লাভ কৰিব। বাংলাদেশ চৰকাৰে এই বিষয়টো আন্তঃৰাষ্ট্ৰীয় মঞ্চত উত্থাপন কৰিবলৈ সাজু হৈছে।
