বাংলাদেশৰ ৰাজনীতিৰ নতুন খবৰ। অন্তৱৰ্তীকালীন চৰকাৰী মুৰব্বী মহম্মদ ইউনুছে উল্লেখ কৰিছে যে- যদি আৱামী লীগে নিজৰ অতীতৰ শাসনৰ বাবে ক্ষমা বিচাৰে তেন্তে চৰকাৰে ইয়াৰ সৈতে মিলন তথা ৰাজনৈতিক প্ৰক্ৰিয়ালৈ ঘূৰি অহাৰ কথা বিবেচনা কৰিব পাৰে। ইয়াৰ অৰ্থ প্ৰাক্তন প্ৰধানমন্ত্ৰী শ্বেখ হাছিনাই পুনৰ নিৰ্বাচনী ৰাজনীতিত প্ৰৱেশ কৰিব পাৰে।
মহম্মদ ইউনুছে স্পষ্টভাৱে ইংগিত দিছে যে- আৱামী লীগে নিজৰ কাৰ্যকালত হোৱা অপশাসন আৰু মানৱ অধিকাৰ উলংঘাৰ অভিযোগৰ বাবে ৰাজহুৱাভাৱে ক্ষমা বিচাৰিব লাগিব। ইয়াৰ পূৰ্বেও ইউনুছে আৱামী লীগ আৰু শ্বেখ হাছিনাৰ পৰা ক্ষমা বিচাৰিছিল যদিও এইবাৰ তেওঁৰ বক্তব্য তাৎপৰ্যপূৰ্ণ বুলি বিবেচিত হৈছে কাৰণ বিষয়টো নিৰ্বাচনী প্ৰক্ৰিয়াৰ মাজলৈ আহিছে। বৰ্তমান আৱামী লীগৰ নিৰ্বাচনত প্ৰতিদ্বন্দ্বিতা কৰাত নিষেধাজ্ঞা আৰোপ কৰা হৈছে।
বাংলাদেশৰ ৰাষ্ট্ৰীয় নিৰাপত্তা উপদেষ্টা খলিলুৰ ৰহমানে আমেৰিকা আৰু UAEৰ পাঁচ দিনীয়া ভ্ৰমণৰ পৰা উভতি অহাৰ সময়তে এই বক্তব্য প্ৰকাশ কৰিছে। আমেৰিকাত খলিলুৰ ৰহমানে বিদেশ বিভাগৰ জ্যেষ্ঠ বিষয়া পল কাপুৰ আৰু এলিছন হুকাৰৰ সৈতে সাক্ষাৎ কৰে। এই বৈঠকসমূহৰ সময়ত কি হৈছিল তাৰ সবিশেষ স্পষ্ট নহয়। অৱশ্যে বাংলাদেশৰ ৰাজনৈতিক বিশ্লেষকসকলে কয় যে- এই আলোচনাত সকলো দলৰ নির্বাচনত অংশগ্রহণৰ ওপৰত গুৰুত্ব আৰোপ কৰা হৈছিল৷
আমেৰিকাই এতিয়াও ৰাজহুৱাভাৱে উল্লেখ কৰা নাই যে- ইউনুছ চৰকাৰে সৰ্বাংগীন নিৰ্বাচন অনুষ্ঠিত কৰিব লাগে। ইফালে ভাৰতে ধাৰাবাহিকভাৱে কৈ আহিছে যে বাংলাদেশৰ নিৰ্বাচনত সকলো ৰাজনৈতিক দল অন্তৰ্ভুক্ত হ’ব লাগে। এই বিষয়টো ২০২৫ চনৰ নৱেম্বৰ মাহত নতুন দিল্লীত খলিলুৰ ৰহমান আৰু ভাৰতৰ ৰাষ্ট্ৰীয় নিৰাপত্তা উপদেষ্টা অজিত ডোভালৰ মাজত হোৱা বৈঠকৰ সময়তো আলোচনা কৰা হৈছিল।
ইফালে বাংলাদেশ নেচনেলিষ্ট পাৰ্টিয়ে নিৰ্বাচনৰ প্ৰস্তুতি আৰম্ভ কৰিছে। ২০২৫ চনৰ ডিচেম্বৰ মাহত দলটোৰ ভাৰপ্ৰাপ্ত সভাপতি তাৰিক ৰহমান বাংলাদেশলৈ ঘূৰি অহাৰ পিছতে বিএনপিৰ কেইবাজনো নেতাই জামাত-ই-ইছলামী (জিআই)ক মুকলিকৈ সমালোচনা কৰি আহিছে। জামাত আৰু ইয়াৰ সহযোগী নেশ্যনেল চিটিজেনছ পাৰ্টিয়েও নিৰ্বাচনী প্ৰক্ৰিয়াত প্ৰভাৱ পেলোৱাৰ অভিযোগ উত্থাপন হৈছে।
ৰাজনৈতিক বিশেষজ্ঞসকলে কয় যে- যদি আৱামী লীগ আৰু শ্বেখ হাছিনাই মহম্মদ ইউনুছৰ চৰ্ত মানি লয় তেন্তে ৰাজনৈতিক পট পৰিৱৰ্তন হ’ব পাৰে। এনে পৰিস্থিতিত ২০২৬ চনৰ ১২ ফেব্ৰুৱাৰীত অনুষ্ঠিত হ’বলগীয়া নিৰ্বাচন পিছুৱাই দি নতুন অধিসূচনা জাৰি কৰিব পাৰে। সকলোৰে দৃষ্টি এতিয়া আৱামী লীগ আৰু শ্বেখ হাছিনাৰ পৰৱৰ্তী সিদ্ধান্তৰ ওপৰত।
