১৯৮৪ চনৰ শিখবিৰোধী সংঘৰ্ষৰ গোচৰত যাৱজ্জীৱন কাৰাদণ্ড ভুগি থকা প্ৰাক্তন কংগ্ৰেছ সাংসদ সজ্জন কুমাৰৰ ৮০ বছৰ বয়সত মৃত্যু ঘটিছে। তিহাৰ কাৰাগাৰত বন্দী হৈ থকা অৱস্থাত তেওঁক দিল্লীৰ ছফদৰজং হাস্পতাললৈ অনা হয় যদিও চিকিৎসকে তেওঁক মৃত বুলি ঘোষণা কৰে।
১৯৮৪ চনৰ হিংসাত্মক ঘটনাৰ সৈতে জড়িত কেইবাটাও গোচৰত অভিযুক্ত সজ্জন কুমাৰক ২০১৮ চনৰ ডিচেম্বৰত দিল্লী উচ্চ ন্যায়ালয়ে পালাম কলনী অঞ্চলত ৫ জন শিখ লোকৰ হত্যা আৰু গুৰুদ্বাৰ জ্বলাই দিয়াৰ ঘটনাত অপৰাধমূলক ষড়যন্ত্ৰৰ বাবে যাৱজ্জীৱন কাৰাদণ্ড বিহিছিল। তদুপৰি, সৰস্বতী বিহাৰৰ আন এটা গোচৰতো এগৰাকী পিতৃ আৰু পুত্ৰক জীৱন্তে জ্বলাই দিয়াৰ অভিযোগত আদালতে তেওঁক পুনৰ যাৱজ্জীৱন কাৰাদণ্ড প্ৰদান কৰিছিল। শেহতীয়াকৈ এটা গোচৰৰ পৰা তেওঁ ৰেহাই পাইছিল যদিও পূৰ্বৰ শাস্তিৰ বাবে তেওঁ কাৰাগাৰতেই বন্দী হৈ আছিল।
