মাৰ্কিন যুক্তৰাষ্ট্ৰৰ শুল্কযুদ্ধ আৰু কূটনৈতিক সংঘাতৰ মাজত ৰাছিয়াই ভাৰতৰ পক্ষত থিয় দি ঘোষণা কৰিছে যে, ভাৰতীয় পণ্যৰ বাবে তেওঁলোকৰ বজাৰৰ দুৱাৰ সদায় মুকলি থাকিব। ৰাছিয়াই এইটোও স্পষ্ট কৰিছে যে, তেওঁলোক ভাৰতৰ ওচৰত তেল বিক্ৰী অব্যাহত ৰাখিব, কিয়নো নতুন দিল্লী মস্কোৰ বাবে অতি গুৰুত্বপূৰ্ণ। এই প্ৰেক্ষাপটত ৰাছিয়াৰ ৰাষ্ট্ৰপতি ভ্লাদিমিৰ পুটিনে এই বছৰৰ শেষৰ ফালে ভাৰত ভ্ৰমণ কৰি প্ৰধানমন্ত্ৰী নৰেন্দ্ৰ মোদীৰ সৈতে বৈঠকত মিলিত হ’ব।
মাৰ্কিন ৰাষ্ট্ৰপতি ড’নাল্ড ট্ৰাম্পে ৰাছিয়াৰ পৰা ভাৰতৰ তেল ক্ৰয়ৰ বাবে অসন্তুষ্ট হৈ ভাৰতীয় পণ্যৰ ওপৰত উচ্চ হাৰত শুল্ক আৰোপ কৰিছে। তেওঁৰ অভিযোগ, ভাৰতৰ সৈতে ৰাছিয়াৰ বাণিজ্যৰ লাভ ইউক্ৰেইনৰ বিৰুদ্ধে যুদ্ধত ব্যৱহাৰ হৈছে। এই সিদ্ধান্তৰ বিৰুদ্ধে ভাৰতে প্ৰথমৰ পৰাই বিৰোধিতা কৰি আহিছে আৰু ভাৰতৰ বিদেশ মন্ত্ৰণালয়ে এই বিষয়ে বিবৃতি প্ৰকাশ কৰিছে। এই কূটনৈতিক উত্তেজনাৰ মাজত ৰাছিয়াই ভাৰতৰ পক্ষ লৈ তেওঁলোকৰ সমৰ্থনৰ কথা পুনৰবাৰ স্পষ্ট কৰিছে।
ভাৰতত অৱস্থিত ৰাছিয়াৰ দূতাবাসৰ এগৰাকী বিষয়াই জনাইছে যে, ৰাষ্ট্ৰপতি পুটিনে এই বছৰৰ শেষৰ ফালে ভাৰত ভ্ৰমণ কৰিব আৰু নতুন দিল্লীত প্ৰধানমন্ত্ৰী মোদীৰ সৈতে বৈঠক কৰিব। যদিও ভ্ৰমণৰ নিৰ্দিষ্ট তাৰিখ এতিয়াও চূড়ান্ত হোৱা নাই, ৰাছিয়াই জনাইছে যে, ভাৰতৰ সৈতে তেওঁলোকৰ দ্বি-পাক্ষিক বাণিজ্য প্ৰতি বছৰে ১০ শতাংশ হাৰত বৃদ্ধি পাব বুলি আশা কৰা হৈছে। ৰাছিয়াৰ দূতাবাসে এইটোও উল্লেখ কৰিছে যে, নতুন দিল্লী তেওঁলোকৰ বাবে অতি গুৰুত্বপূৰ্ণ কৌশলগত অংশীদাৰ।
ৰাছিয়াৰ পৰা তেল ক্ৰয় কৰা দেশসমূহৰ ভিতৰত ভাৰত আৰু চীন প্ৰথম শাৰীত আছে। এই পৰিপ্ৰেক্ষিতত ৰাছিয়াৰ দূতাবাসে নতুন দিল্লীৰ লগতে বেইজিঙৰ উদ্দেশ্যেও বাৰ্তা প্ৰেৰণ কৰিছে। তেওঁলোকে জনাইছে যে, অতি সোনকালে ভাৰত, চীন আৰু ৰাছিয়াৰ মাজত এখন ত্ৰি-পাক্ষিক বৈঠক অনুষ্ঠিত হ’ব পাৰে। ৰাছিয়াৰ মতে, আঞ্চলিক নিৰাপত্তা নিশ্চিত কৰাৰ বাবে মস্কো, দিল্লী আৰু বেইজিঙৰ মাজত পাৰস্পৰিক সহযোগিতা অতি গুৰুত্বপূৰ্ণ।
