চীনা প্ৰযুক্তিৰে নিৰ্মিত যুদ্ধবিমান JF-17 ব্যৱহাৰ কৰে পাকিস্তানে। সেই যুদ্ধবিমানৰ বাবেই পাকিস্তানে ৰাছিয়াৰ পৰা ইঞ্জিন কিনিব বিচাৰে! সম্প্রতি এনে কিছু বিতৰ্ক সৃষ্টি হৈছিল। ৰাছিয়াৰ সৈতে ভাৰতৰ বন্ধুত্বপূৰ্ণ সম্পৰ্ক আছে। আমেৰিকাৰ সৈতে শুল্ক যুদ্ধৰ মাজতে দুই দেশ আৰু ঘনিষ্ঠ হৈছে। সমান্তৰালকৈ পাকিস্তানক কিদৰে সামৰিক সহযোগিতা কৰিবলৈ ৰাজি হ’ল মস্কো? চলিত বিতৰ্কৰ মাজত মুখ খুলিছে ৰাছিয়াই। জনাইছে, পাকিস্তানৰ সৈতে এনে কোনো নিশ্চিত চুক্তি হোৱা নাই।
ৰিপোৰ্টত দাবী কৰা হৈছিল যে, চীনৰ JF-17 থান্ডাৰ ব্লক-3 যুদ্ধবিমানৰ সেৱা আৰু উন্নত কৰাৰ বাবে ৰাছিয়াৰ পৰা RD-93MA ইঞ্জিন কিনিছে পাকিস্তান। ভাৰতীয় সংবাদমাধ্যম WIONয়ে এই বিষয়ত ৰাছিয়াৰ সংশ্লিষ্ট কৰ্তৃপক্ষৰ সৈতে যোগাযোগ কৰিছিল। ৰাছিয়াৰ সূত্ৰ উল্লেখ কৰি WIONয়ে জনাইছে যে, মস্কোৱে এই গুজব খণ্ডন কৰিছে। ৰাছিয়াৰ তৰফৰ পৰা কোৱা হৈছে, “এই খবৰৰ কোনো নিশ্চয়তা নাই। ভাৰত-ৰাছিয়া সম্পৰ্কৰ বিষয়ে যিসকলে খবৰ ৰাখে, তেওঁলোকে এইটো অযুক্তিকৰ বুলি মানে। পাকিস্তানৰ সৈতে ৰাছিয়াৰ বন্ধুত্ব নাই।”
ডিচেম্বৰত ভাৰত-ৰাছিয়া বাৰ্ষিক সন্মিলন
চলিত বছৰৰ ডিচেম্বৰ মাহত ভাৰত আৰু ৰাছিয়াৰ বাৰ্ষিক সন্মিলন অনুষ্ঠিত হ’ব। তাত অংশ ল’বলৈ ভাৰতলৈ আহিব ৰাছিয়াৰ ৰাষ্ট্ৰপতি ভ্লাদিমিৰ পুটিন। বিগত সপ্তাহত মস্কোত ভালদাই ফ’ৰাম সন্মিলনৰ পৰা ভাৰতৰ সৈতে বন্ধুত্বৰ প্ৰশংসা কৰিছে পুটিনে। ভাৰতৰ প্ৰধানমন্ত্ৰী নৰেন্দ্ৰ মোদীৰ প্ৰশংসাও তেওঁৰ মুখৰ পৰা শুনা গৈছে। পুটিনে জনাইছে যে, আমেৰিকাৰ আৰোপিত শুল্কৰ কাৰণে ভাৰতৰ যি ক্ষতি হৈছে, তাক পূৰণ কৰিব ৰাছিয়াই। ভাৰতৰ সৈতে বাণিজ্যিক ঘাটি হ্ৰাস কৰাৰ বাবে আৰু অধিক কৃষিজাত পণ্য আৰু ঔষধ কিনাৰ পৰিকল্পনা কৰিছে মস্কোৱে। ভাৰত-ৰাছিয়া বাৰ্ষিক সন্মিলনত অংশ দিবলৈ বিগত বছৰত ৰাছিয়ালৈ গৈছিল মোদী। এইবাৰ পুটিন আহিব ভাৰতলৈ।
ৰাছিয়াৰ পৰা অস্ত্ৰ আমদানি
ৰাছিয়াৰ পৰা প্ৰচুৰ অস্ত্ৰ-শস্ত্ৰ ক্ৰয় কৰে ভাৰতে। ৰাছিয়াৰ S-400 বিগত মে’ মাহত ‘অপাৰেচন সিন্দূৰ’-ৰ সময়ত পাকিস্তানৰ বিৰুদ্ধে প্ৰয়োগ কৰিছিল নতুন দিল্লীয়ে। তাত সফলতাও আহিছে। ইয়াৰ উপৰিও ৰাছিয়াৰ পৰা খনিজ তেল কিনে ভাৰত। ইউক্ৰেইনত যুদ্ধ আৰম্ভ হোৱাৰ পিছত ৰাছিয়াৰ পৰা তেল আমদানি আৰু বাঢ়ি গৈছে। যাৰ বাবে আমেৰিকাই আপত্তি কৰিছিল। ভাৰতৰ ওপৰত শাস্তিমূলক ৫০ শতাংশ শুল্কও আৰোপ কৰিছে ৱাছিংটনে। কিন্তু ক্ৰমাগত মাৰ্কিন হুমকি সত্ত্বেও এতিয়াও ৰাছিয়াৰ পৰা খনিজ তেল কিনা বন্ধ কৰা নাই ভাৰতে।
