কাজিৰঙালৈ যোৱাৰ পথত বিচৰণ কৰিছে এটা প্ৰকাণ্ড গঁড়ে। বন কৰ্মী আৰু গঁড়ৰ মাজত খেদা-খেদি। বাৰে বাৰে গঁড়টোক খেদিবলৈ চেষ্টা বনকৰ্মীৰ। কেইবাজাই গুলী ফুটোৱাৰ পিচতো আঁতৰি যোৱা নাই গঁড়টো। ৩৭নং ৰাষ্ট্ৰীয় ঘাই পথত ৰূদ্ৰ ৰূপ ধাৰণ কৰা গঁড়টোক খেদি পঠিয়াবলৈ বাৰে বাৰে চেষ্টা কৰিও বিফল হৈছে বনকৰ্মী। শুকুৰবাৰৰ দিনটোত এক প্ৰকাৰ বন্ধ হৈ পৰে যান-বাহনৰ যাতায়ত। ইতিমধ্যে উন্মাদ গঁড়টোৰ আক্ৰমণত আহত হৈছে কাজিৰঙা ৰাষ্ট্ৰীয় উদ্যানৰ কেইবাটাও পোহনীয়া হাতী।
বন বিভাগৰ গাড়ীতো আক্ৰমণ কৰে উন্মাদ গঁড়টোৱে। বৃহস্পতিবাৰে কাৰ্বি-আংলং পাহাৰৰ দিশৰ পৰা ওলাই আহিছিল গঁড়টো। কাজিৰঙাৰ দিশলৈ পাৰ হ’বলৈ ধৰোতেই হালধিবাৰীৰ সমীপতে এখন টাটা ডি আই গাড়ীৰ সৈতে দুৰ্ঘটনাত পতিত হয় গঁড়টো। কিছু সময় অচেতন হৈ পৰি থকাৰ পিচত কাষৰ হাবিত আশ্ৰয় লয় গঁড়টোৱে। ৰাষ্ট্ৰীয় ঘাই পথৰ কাষৰ এখন হাবিত আশ্ৰয় লৈ থকা গঁড়টোক খেদি পঠিয়াবলৈ কেইবাজাই গুলী ফুটাইছে যদিও আঁতৰাই পঠিয়াব পৰা নাই।
ইফালে, কলিয়াবৰৰ সোণাৰী গাঁৱত বাঘৰ আতংক। খাদ্যৰ সন্ধানত শিলঘাট সংৰক্ষিত বনাঞ্চলৰ পৰা ওলাই অহা এটা প্ৰকাণ্ড ঢেঁকীয়াপতীয়া বাঘ গাঁওখনত বিচৰণ কৰাত আতংকৰ সৃষ্টি হৈছে গাঁওখনত। গাঁওখনৰ কেইবাঘৰো লোকৰ চোতালত দেখা পোৱা গৈছে বাঘৰ ভৰিৰ খোজ। গঁড় আৰু বাঘৰ সন্ত্ৰাসে আতংকৰ সৃষ্টি কৰিছে। বন্যজন্তুৰ বাসস্থান সংকোচনৰ ফলতেই খাদ্যৰ সংকটত ভোগা জীৱ-জন্তু সমূহ ওলাই আহিছে এনেদৰে।
