নলবাৰী চহৰৰ চ’কবজাৰ মাজদিয়া নিৱাসী বিশিষ্ট বেদজ্ঞ পণ্ডিত, অৱসৰপ্ৰাপ্ত কৃতী শিক্ষক, বিশিষ্ট সমাজসেৱী নাৰায়ণ শৰ্মাৰ বৃহস্পতিবাৰে দেহাৱসান ঘটে। ৮৬ বছৰত মৃত্যুবৰণ কৰা প্ৰয়াত নাৰায়ণ শৰ্মা শ্বাস-প্ৰশ্বাসজনিত ৰোগত আক্ৰান্ত হৈ যোৱা ৩০ ডিচেম্বৰৰ পৰা GMCH ত চিকিৎসাধীন হৈ আছিল। ২ জানুৱাৰীৰ দিনা দিনৰ প্ৰায় ১ বজাত চিকিৎসাধীন অৱস্থাতে হৃদযন্ত্ৰৰ ক্ৰিয়া বন্ধ হৈ আকস্মিকভাৱে মৃত্যুমুখত পৰে। আৰ্য্য সাহিত্য সভা, নলবাৰী ব্ৰাহ্মণ সমাজ, সদৌ নলবাৰী জ্যোতিষ সন্মিলন আদিকে ধৰি নলবাৰীৰ বিভিন্ন অনুষ্ঠান-প্ৰতিষ্ঠানৰ সৈতে জড়িত আছিল প্ৰয়াত শৰ্মা। শাস্ত্ৰজ্ঞ পণ্ডিত গৰাকীৰ মৃত্যুত নলবাৰীত শোক ছাঁ পৰিছে। মৃত্যুৰ সময়ত প্ৰয়াত শৰ্মাই পত্নী, দুই পুত্ৰ, চাৰি কন্যা, বোৱাৰী-জোৱাই, নাতি-নাতিনী, নাতি জোৱাইসহ পৰিয়াল-পৰিজনক এৰি থৈ গৈছে। শুকুৰবাৰে অসংখ্য পৰিয়ালৰ লোকৰ লগতে গুণমুগ্ধৰ উপস্থিতিত প্ৰয়াত শৰ্মাৰ শেষকৃত্য সম্পন্ন কৰা হয়।
