চলিত মাহতে গুৱাহাটীৰ বৰ্ষাপাৰাৰ এ চি এ ক্ৰিকেট ষ্টেডিয়ামত হ’বলগা ইণ্ডিয়ান প্ৰিমিয়াৰ লীগ [আই পি এল] ৰ মেচ দুখনৰ প্ৰস্তুতি সম্প্ৰতি দিনে-নিশা চলিছে৷ গুৱাহাটীক দ্বিতীয় ঘৰ হিচাপে লোৱা ৰাজস্থান ৰয়েলছে ষ্টেডিয়ামৰ লগতে গুৱাহাটী মহানগৰীত অসমীয়া ভাষাৰ হ’ৰ্ডিঙৰে অনুৰাগীক উভয় মেচলৈ আমন্ত্ৰণ জনোৱাৰ লগতে সমৰ্থনো বিচাৰিছে৷ উল্লেখ্য যে ৰাজস্থান ৰয়েলছে এইবাৰ ঘৰুৱা মেচৰ আৰম্ভনি গুৱাহাটীৰ পৰাই কৰিব৷ সেয়ে দূয়োখন মেচতে খেলৰ স্বাভাৱিক ৰোমাঞ্চৰ লগতে উদ্বোধনীৰ অন্য মনোৰঞ্জন কাৰ্যসূচীও থাকিব৷
ইফালে, গুৱাহাটীত দুখনকৈ হাইভল্টেজ আই পি এল মেচ হোৱাক লৈ প্ৰস্তুতি কৰিছে অসম ক্ৰিকেট সন্থা তথা অসম চৰকাৰৰ সহযোগত গুৱাহাটী পৌৰ নিগমে৷ এ চি এ ষ্টেডিয়ামৰ চৌহদ পৰিস্কাৰ কৰি নানান ৰঙী ফুলৰে সজাই তুলিছে৷ আনহাতে, অসম চৰকাৰে ষ্টেডিয়ামৰ চৌদিশে থকা বাট-পথ নিৰ্মান কৰাৰ লগতে সামসিকভাবে ফ্লাই-অভাৰৰ কাম বন্ধ ৰাখি যাতায়ত ব্যৱস্থাটো সুচল কৰি তুলিছে৷ গুৱাহাটী পৌৰ নিগমে ষ্টেডিয়ামৰ বাহিৰৰ চৌহদ পাৰিস্কাৰ কৰাৰ কামো আৰম্ভ কৰিছে৷ খেল উপভোগ কৰিবলৈ অহা দৰ্শক তথা বাহিৰৰ পৰা আহিব লগা উভয় দলৰ তাৰকা অতিথিয়ে যাতে কোনো অসুবিধাৰ সন্মুখীন নহয় সেই দিশত সুৰুঙা নথকা ব্যৱস্থা গঢ়ি তোলা হ’ব৷
উল্লেখ্য যে এইবাৰ অভিলেখসংখ্যক দৰ্শকে উভয় আই পি এল মেচ উপভোগ কৰিব৷ কাৰণ দূয়োখন মেচৰে অনলাইন টিকট দ্ৰুতগতিত দৰ্শকে ক্ৰয় কৰিছে৷ অহা ৩০ মাৰ্চত হ’বলগা চেন্নাই ছুপাৰ কিংছ আৰু ৰাজস্থান ৰয়েলছৰ মাজৰ দ্বিতীয়খন আই পি এল মেচৰ টিকট এতিয়া দহ হেজাৰতকৈয়ো কম বিক্ৰি হ’বলৈ বাকী আছে৷ আনহাতে, অহা ২৬ মাৰ্চত গুৱাহাটীত হ’বলগা ৰাজস্থান ৰয়েলছ আৰু কলকাতা নাইট ৰাইডাৰ্ছৰ মাজৰ আই পি এল প্ৰথম মেচখনৰ টিকটো ইতিমধ্যে পঞ্চাছ শতাংশ বিক্ৰি হৈছে৷ দৰ্শকৰ ভিৰৰ প্ৰতি লক্ষ্য ৰাখি সাজু হৈছে আৰক্ষী প্ৰশাসনো৷
ইফালে, আই পি এলৰ প্ৰথম বৰ্ষৰ চেম্পিয়ন ৰাজস্থান ৰয়েলছে হায়দৰাবাদত ছানৰাইজাৰ্ছৰ বিৰুদ্ধে অহা ২৩ মাৰ্চত প্ৰথমখন মেচ খেলি নতুন ছিজনৰ অভিযান আৰম্ভ কৰিব৷ ২৪ মাৰ্চত গুৱাহাটীত উপস্থিত হ’ব দলটো৷ ইফালে, কে কে আৰ ২৩ মাৰ্চতে গুৱাহাটীত উপস্থিত হোৱাৰ সম্ভাৱনা আছে৷ ৰঙৰ উৎসৱ হোলীৰ পাছতে আই পি এল ক্ৰিকেট উৎসৱ তথা ৰাজস্থান ৰয়েলছৰ গোলাপী ৰঙত ডুব যাব মহানগৰী৷
