এইবাৰ অপৰাধীৰ সন্ধানত যোৱা আৰক্ষীৰ ওপৰতেই চলিল আক্ৰমণ। প্ৰায় ২০০জনীয়া দলে আক্ৰমণ কৰিলে বৰপেটাৰোড আৰক্ষীক। বৰপেটাৰ হাউলীৰ সমীপৰ হেলনাৰ পাম গাঁৱত নিশা বৰপেটা ৰোড আৰক্ষীৰ ওপৰত দলবদ্ধ আক্ৰমণ একাংশ সংখ্যালঘু সম্প্ৰদায়ৰ লোকৰ৷
বাক্সা জিলাৰ গোৱৰ্ধনা আৰক্ষী থানাৰ অধীনৰ হেলনাৰ পাম গাঁৱলৈ অভিযুক্তৰ সন্ধানত যোৱা বৰপেটা ৰোড আৰক্ষীৰ এটা দলৰ ওপৰত স্থানীয় একাংশ লোকে চলালে আক্ৰমণ৷
অপৰাধীৰ পক্ষত ওলাই অহা গাঁওখনৰ প্ৰায় দুশজনীয়া দলে দা, লাঠী আৰু আন চোকা অস্ত্ৰৰে আৰক্ষীৰ দলটোৰ ওপৰতে চলালে আক্ৰমণ এই ঘটনাৰ ফলত আঘাতপ্ৰাপ্ত হয় আৰক্ষীৰ সৈতে যোৱা ছায়েদ আলী নামৰ এজন লোক।
আক্ৰমণৰ পৰা ৰক্ষা পাবলৈ তথা আক্ৰমণকাৰীক ছত্ৰভংগ দিয়াবলৈ শূন্যলৈ গুলীচালনা কৰিবলৈ বাধ্য হয় আৰক্ষী।
উক্ত আক্ৰমণত আৰক্ষীৰ কোনো লোক আহত হৈছে নে নাই সেই তথ্য সদৰী কৰা নাই আৰক্ষীয়ে। সমগ্ৰ ঘটনাক লৈ নিশা সৃষ্টি হয় তীব্ৰ চাঞ্চল্যৰ।
আৰক্ষীৰ ওপৰত আক্ৰমণ চলোৱাৰ অভিযোগত আৰক্ষীয়ে গ্ৰেপ্তাৰ কৰিছে কামাল মিৰ আৰু ছানিদুল ইছলাম আৰু ৰাজিবুল আলী নামৰ তিনিজনক।
