কলকাতাৰ এন্টালি থানাৰ কাহিনী এয়া। এজন যুৱকে তেওঁৰ প্ৰেমিকাক লগত লৈ থানাত উপস্থিত হয়। যুৱকজনৰ পৰিধানত আৰক্ষীৰ পোছাক, য’ত লিখা আছে ‘ইনস্পেক্টৰ অৱ ৱেষ্ট বেংগল পুলিচ’। তেওঁ থানাত প্ৰৱেশ কৰিয়েই এফালৰ পৰা সকলোকে চেল্যুট কৰিছে। তেওঁৰ পোছাকত লাগি থকা ‘ইনস্পেক্টৰ অৱ ৱেষ্ট বেংগল পুলিচ’ পদমৰ্যাদাৰ নিয়মো মানি চলা দেখা নগৈছিল। এই আচৰণত থানাৰ কৰ্মচাৰীসকলৰ সন্দেহ জাগে। তাৰ পিছত আৰক্ষীৰ প্ৰশ্নৰ সন্মুখীন হৈ যুৱকজন থতমত খাই অসংলগ্ন উত্তৰ দিবলৈ ধৰে। ফলত আৰক্ষীসকলে বুজিবলৈ বাকী নাথাকিল যে তেওঁ এজন ভুৱা আৰক্ষী। তৎক্ষণাৎ তেওঁক গ্ৰেপ্তাৰ কৰা হয়। এই ঘটনা শুকুৰবাৰে এন্টালি থানাত সংঘটিত হৈছে।
আৰক্ষীৰ সূত্ৰ অনুসৰি, ধৃত যুৱকৰ নাম দীপ্তেন্দু বাগ, তেওঁ দক্ষিণ ২৪ পৰগনাৰ কেনিং অঞ্চলৰ বাসিন্দা। প্ৰাথমিক তদন্তত ধাৰণা কৰা হৈছে যে, তেওঁ নিজৰ প্ৰেমিকাৰ মন জয় কৰিবলৈ আৰক্ষী বিষয়াৰ বেশত থানালৈ আহিছিল। কিন্তু এই ঘটনাৰ আঁৰত আন কোনো উদ্দেশ্য আছে নেকি, তাকো পৰীক্ষা কৰা হৈছে। আৰক্ষীৰ মতে, কোনো ইনস্পেক্টৰে নিজৰ অধীনস্থক চেল্যুট নকৰে। কিন্তু দীপ্তেন্দুৱে সকলোকে চেল্যুট কৰাৰ ধৰণটো আৰক্ষীৰ বাবে অস্বাভাৱিক যেন লাগিছিল। তেওঁলোকে তৎক্ষণাৎ বুজি পায় যে তেওঁ ভুৱা আৰক্ষী।
জেৰাত ধৃত যুৱকজনে কয় যে, কেইদিনমান আগতে তেওঁৰ মানিবেগ চুৰি হৈ গৈছিল। তেওঁ এন্টালি থানাত অভিযোগ দাখিল কৰিবলৈ আহিছিল। সেই সময়ত থানাৰ এজন আৰক্ষী বিষয়াই তেওঁক ধন দি সহায় কৰিছিল। সেই বিষয়াজনক ধন্যবাদ জনাবলৈ তেওঁ প্ৰেমিকাক লগত লৈ থানালৈ আহিছিল। কিন্তু আৰক্ষীৰ পোছাক পৰিধান কৰি কিয় আহিছিল, তাৰ স্পষ্ট উত্তৰ এতিয়াও পোৱা নাই।
যুৱকজনে জেৰাত যি কৈছে, সেই সকলোখিনি পৰ্যালোচনা কৰা হৈছে। অৱশ্যে, তেওঁৰ সৈতে থানালৈ অহা প্ৰেমিকাগৰাকীক আইনৰ আওতালৈ অনা হোৱা নাই বুলি জানিব পৰা গৈছে।
