পৰ্যটকৰ বাবে কাইলৈ পৰা অৰ্থাৎ ১৩ অক্টোবৰৰ পৰা পুনৰ মুকলি হ’ব পবিতৰা অভয়াৰণ্য। মঙলবাৰে পুৱা ৯ বজাত বনমন্ত্ৰী জয়ন্ত মল্ল বৰুৱাই আনুষ্ঠানিকভাৱে ২০২৬-২৭ পৰ্যটন বৰ্ষৰ শুভাৰম্ভ কৰিব। অনুষ্ঠানত বিশিষ্ট অতিথি হিচাপে উপস্থিত থাকিব মন্ত্ৰী পীযুষ হাজৰিকা।
নতুন পৰ্যটন বৰ্ষক আদৰণি জনোৱাৰ বাবে ইতিমধ্যে সাজু হৈছে পবিতৰা অভয়াৰণ্য কৰ্তৃপক্ষ। অভয়াৰণ্যখনৰ ভিতৰৰ বাট-পথসমূহৰ মেৰামতিৰ কাম আৰম্ভ কৰা হৈছে। পৰ্যটকৰ সুবিধাৰ্থে জীপ ছাফাৰী আৰু হাতী ছাফাৰীৰ ব্যৱস্থাও কৰা হৈছে। ইয়াৰ বাবে কৰ্তৃপক্ষই ৩০খন জীপ সাজু কৰি ৰাখিছে।
মাত্ৰ ৩৮ বৰ্গ কিলোমিটাৰ এলেকাজুৰি বিস্তৃত পবিতৰা অভয়াৰণ্য এশিঙীয়া গঁড়ৰ বাবে বিশেষভাৱে পৰিচিত। উপলব্ধ তথ্য অনুসৰি, অভয়াৰণ্যখনত ১০৬টা এশিঙীয়া গঁড়ৰ লগতে পাঁচ শতাধিক বনৰীয়া ম’হ, বিভিন্ন প্ৰজাতিৰ পক্ষী আৰু সহস্ৰাধিক বনগাহৰি আছে। প্ৰকৃতি আৰু বন্যপ্ৰাণীপ্ৰেমী পৰ্যটকৰ বাবে পবিতৰা এক আকৰ্ষণীয় গন্তব্যস্থান।
উল্লেখ্য যে, বিগত পৰ্যটন বৰ্ষত পবিতৰা অভয়াৰণ্য দৰ্শন কৰিছিল ৪২ হাজাৰৰো অধিক দেশীয় পৰ্যটকে। আনহাতে, অভয়াৰণ্যখনলৈ অহা বিদেশী পৰ্যটকৰ সংখ্যা আছিল ৭৬৩গৰাকী।
নতুন পৰ্যটন বৰ্ষত দেশী-বিদেশী পৰ্যটকৰ আগমনে পবিতৰাৰ পৰ্যটন ক্ষেত্ৰলৈ নতুন গতি আনিব বুলি আশা কৰা হৈছে।
