কামৰূপ জিলাৰ আমিনগাঁৱত আৰক্ষীৰ অভিযানত বৃহৎ পৰিমাণৰ নিচাযুক্ত দ্ৰব্য য়াবা টেবলেট জব্দ কৰা হৈছে। নামনি অসমলৈ সৰবৰাহ কৰাৰ সময়তে এখন ছুইফট বাহনৰ পৰা জব্দ কৰা হয় ৪০ হাজাৰ য়াবা টেবলেট।
প্ৰাপ্ত তথ্য অনুসৰি, মিজোৰামৰ পৰা ছুইফট বাহনখনত ড্ৰাগছখিনি সৰবৰাহ কৰি অনা হৈছিল। এই ঘটনা সন্দৰ্ভত আৰক্ষীয়ে বৰপেটাৰ হাকিম দেৱান নামৰ এজন লোকক গ্ৰেপ্তাৰ কৰিছে।
কামৰূপৰ অতিৰিক্ত আৰক্ষী অধীক্ষকৰ নেতৃত্বত চলোৱা হৈছিল এই অভিযান। অভিযানত জব্দ কৰা য়াবা টেবলেটখিনিৰ ক’লা বজাৰ মূল্য প্ৰায় ১০ কোটি টকা বুলি জানিব পৰা গৈছে।
এই বৃহৎ পৰিমাণৰ নিচাযুক্ত দ্ৰব্য জব্দৰ ঘটনাই ড্ৰাগছ সৰবৰাহৰ বিৰুদ্ধে আৰক্ষীৰ অভিযানত এক গুৰুত্বপূৰ্ণ সফলতা হিচাপে বিবেচিত হৈছে। ঘটনা সন্দৰ্ভত আৰক্ষীৰ তদন্ত অব্যাহত আছে।
