ভাৰতীয় জনতা পাৰ্টিৰ (বিজেপি) নৱনিযুক্ত ৰাষ্ট্ৰীয় কাৰ্যনিৰ্বাহক দলৰ বিষয়ববীয়াসকলক অভিনন্দন জনাইছে প্ৰধানমন্ত্ৰী নৰেন্দ্ৰ মোদীয়ে। সামাজিক মাধ্যম ‘এক্স’ৰ এক পোষ্টযোগে প্ৰধানমন্ত্ৰীয়ে কয় যে এই নতুন দলটো সাংগঠনিক অভিজ্ঞতা, যুৱ শক্তি আৰু তৃণমূল পৰ্যায়ৰ জনসম্পৰ্কৰ এক উৎকৃষ্ট সংমিশ্ৰণ। তেওঁ বিশ্বাস প্ৰকাশ কৰে যে নৱনিযুক্ত বিষয়ববীয়াসকলে দলৰ সংগঠন অধিক শক্তিশালী কৰাৰ লগতে জনসেৱাক মূল লক্ষ্য হিচাপে লৈ নিষ্ঠাৰে কাম কৰি যাব।
বিজেপিৰ ৰাষ্ট্ৰীয় সভাপতি নীতিন নবীনেও নতুন সমিতিক আদৰণি জনাই শুভেচ্ছা জ্ঞাপন কৰে। তেওঁ উল্লেখ কৰে যে অভিজ্ঞতা আৰু উদ্যমৰ মিশ্ৰণেৰে গঠিত এই দলে প্ৰধানমন্ত্ৰী মোদীৰ পথপ্ৰদৰ্শনত সংগঠনটোক এক নতুন গতিশীলতা প্ৰদান কৰিব। এগৰাকী নিষ্ঠাবান কাৰ্যকৰ্তাৰ মনোভাৱেৰে প্ৰতিগৰাকী সদস্যই ‘বিকশিত ভাৰত’ৰ সংকল্পক আগুৱাই লৈ যোৱাৰ লগতে ৰাষ্ট্ৰ নিৰ্মাণৰ প্ৰতিশ্ৰুতিক নতুন উচ্চতালৈ লৈ যাব বুলি তেওঁ আশা প্ৰকাশ কৰে। ইয়াৰ উপৰিও উত্তৰ প্ৰদেশৰ মুখ্যমন্ত্ৰী যোগী আদিত্যনাথেও নৱনিযুক্ত বিষয়ববীয়াসকলক অভিনন্দন জনাই কয় যে এই নতুন দলটোৱে বিজেপিৰ ‘ৰাষ্ট্ৰ প্ৰথম’ (Nation First) সংকল্পক সমাজৰ প্ৰতিটো স্তৰলৈ লৈ যাব।
উল্লেখ্য যে ৰাষ্ট্ৰীয় সভাপতি নীতিন নবীনৰ নেতৃত্বত বিজেপিয়ে এক বৃহৎ সাংগঠনিক সালসলনি ঘটাই নতুন কেন্দ্ৰীয় দল ঘোষণা কৰিছে। এই নতুন সমিতিত ১৩ গৰাকী ৰাষ্ট্ৰীয় উপ-সভাপতি, ৮ গৰাকী ৰাষ্ট্ৰীয় সাধাৰণ সম্পাদক আৰু ১৬ গৰাকী ৰাষ্ট্ৰীয় সম্পাদকৰ লগতে অন্যান্য গুৰুত্বপূৰ্ণ বিষয়ববীয়াক নিযুক্তি দিয়া হৈছে। উপ-সভাপতিৰ তালিকাত প্ৰাক্তন কেন্দ্ৰীয় মন্ত্ৰী আৰু জ্যেষ্ঠ নেতা ৰাম মাধৱ, লোকসভাৰ সাংসদ ডি পুৰন্দেশ্বৰী, উত্তৰাখণ্ডৰ প্ৰাক্তন মুখ্যমন্ত্ৰী তীৰ্থ সিং ৰাৱত আৰু ৰাজস্থানৰ প্ৰাক্তন মুখ্যমন্ত্ৰী বসুন্ধৰা ৰাজেৰ দৰে বিশিষ্ট নেতাক স্থান দিয়া হৈছে। একেদৰে প্ৰাক্তন কেন্দ্ৰীয় মন্ত্ৰী স্মৃতি ইৰানীক দলৰ ৰাষ্ট্ৰীয় সাধাৰণ সম্পাদক হিচাপে গুৰুত্বপূৰ্ণ দায়িত্ব অৰ্পণ কৰা হৈছে।
