তিনি বছৰ পাছত পেৰিছত পুনৰ লগ হোৱাৰ প্রতিশ্রুতিৰে অন্ত পৰিল টকিঅ’ অলিম্পিকৰ৷ জাপানৰ চহকী ঐতিহ্য–সংস্কৃতি আৰু বাৰেৰহণীয়া কলা–কৃষ্টি উদ্ভাসিত হোৱা সামৰণী অনুষ্ঠানত নৃত্য–গীত আৰু ভিন্নৰঙী পোহৰৰ অভিনৱ সমাহাৰে ক্রীড়ানুৰাগীক আপ্লুত কৰে৷ এই অনুষ্ঠানত আন্তঃৰাষ্ট্রীয় অলিম্পিক কমিটীয়ে পৰৱর্তী অলিম্পিকৰ আয়োজক চহৰ পেৰিছক অলিম্পিক পতাকা হস্তান্তৰ কৰে৷ সামৰণী অনুষ্ঠানত উপস্থিত থাকি পেৰিছৰ মেয়ৰ এনি হিদালগোয়ে অলিম্পিকৰ পতাকা গ্রহণ কৰে৷
ফ্ৰান্সৰ ৰাজধানী পেৰিছ হৈছে এক প্ৰধান ইউৰোপীয়ান চহৰ। কলা, জ্যোতিৰ্বিজ্ঞান আৰু সংস্কৃতিৰ এক গোলকীয় কেন্দ্ৰ – পেৰিছ। আইফেল টাৱাৰ আৰু দ্বাদশ শতিকাৰ গথিক নটৰ-ডেম কেথেড্ৰেলৰ দৰে চিহ্নৰ বাহিৰেও, চহৰখন ৰু ডু ফাউবাৰ্গ ছেইণ্ট-অনাৰৰ কেফে সংস্কৃতি আৰু ডিজাইনাৰ বুটিকৰ বাবেও জনাজাত পেৰিছ। এই পেৰিছতে অনুষ্ঠিত হ’ব ২০২৪ চনৰ অলিম্পিক গেমছ। ইয়াৰ পূৰ্বেও ১৯০০ আৰু ১৯২৪ চনত পেৰিছত অনুষ্ঠিত হৈছিল অলিম্পিক গেমছ। পেৰিছ হ’ব মডাৰ্ণ গেমছৰ দ্বিতীয় খন চহৰ, যিয়ে তিনিখন অলিম্পিক আয়োজন কৰাৰ সুযোগ লাভ কৰিছে। ইয়াৰ পূৰ্বে লণ্ডনে এই সুযোগ লাভ কৰিছিল।
লণ্ডনত ১৯০৮, ১৯৪৮ আৰু ২০১২ চনত অনুষ্ঠিত হৈছিল অলিম্পিক গেমছ। ১৯২৪ চনৰ গ্ৰীষ্মকালীন অলিম্পিক প্ৰথম বিশ্বযুদ্ধৰ পিছত অনুষ্ঠিত হোৱা দ্বিতীয় খন খেল আছিল৷ যুদ্ধৰ পিছত এক সামূহিক ঐক্য প্ৰদৰ্শন কৰি ৪৪খন ৰাষ্ট্ৰই ১৯২৪ চনৰ ৪ মে’ৰ পৰা ২৭ জুলাইলৈকে ১২৬টা বিভিন্ন প্ৰতিযোগিতাত অংশগ্ৰহণ কৰিছিল৷ অৱশ্যে, নিৰাপত্তাজনিত কাৰণত জাৰ্মানীক খেললৈ আমন্ত্ৰণ জনোৱা হোৱা নাছিল। ২০২৪ চনৰ গ্ৰীষ্মকালীন অলিম্পিক ২৭ জুলাই তাৰিখৰ পৰা ২০২৪ চনৰ ১২ আগষ্টলৈ অনুষ্ঠিত হ’ব।
