জব্বলপুৰৰ মন্দিৰসমূহত মিনি স্কাৰ্ট বা জিন্স পৰিধান কৰি প্ৰৱেশ নিষেধ! মধ্যপ্ৰদেশৰ জব্বলপুৰৰ প্ৰায় ৪০টা মন্দিৰৰ বাহিৰত মহিলাসকলৰ বাবে নতুন পোচাক-নিৰ্দেশনা জাৰি কৰি পোষ্টাৰ লগোৱা হৈছে। এই পোষ্টাৰসমূহত ‘মহাকাল সঙ্ঘ আন্তৰ্জাতিক বজৰং দল’ নামৰ এটা সংগঠনৰ নাম উল্লেখ কৰা হৈছে। পোষ্টাৰত দাবী কৰা হৈছে যে, মন্দিৰত প্ৰৱেশৰ বাবে ভাৰতীয় সংস্কৃতি অনুসৰি পোচাক পৰিধান কৰিব লাগিব। এই ঘটনা পোহৰলৈ অহাৰ পিছত চহৰখনত তীব্ৰ চৰ্চাৰ সৃষ্টি হৈছে।
জব্বলপুৰৰ বিভিন্ন মন্দিৰৰ বাহিৰত এই বিতৰ্কিত পোষ্টাৰ দেখা গৈছে। পোষ্টাৰত লিখা আছে, “যদি আপুনি মিনি স্কাৰ্ট, জিন্স-টপ বা পশ্চিমীয়া পোচাক পৰিধান কৰি আহে, তেন্তে কৃপা কৰি বাহিৰৰ পৰাই মন্দিৰ দৰ্শন কৰক। মন্দিৰত প্ৰৱেশৰ বাবে মহিলাসকলে ভাৰতীয় সংস্কৃতি মানি পোচাক পৰিধান কৰিব লাগিব।” ইয়াৰ উপৰিও মহিলাসকলক মন্দিৰত প্ৰৱেশৰ সময়ত মূৰ ঢাকি ৰাখিবলৈ নিৰ্দেশ দিয়া হৈছে। এই পোষ্টাৰ লগোৱাৰ কাৰণ ব্যাখ্যা কৰি সংগঠনটোৱে জনাইছে যে, তেওঁলোকৰ মূল উদ্দেশ্য হৈছে ভাৰতীয় সংস্কৃতিৰ সংৰক্ষণ।
‘মহাকাল সঙ্ঘ আন্তৰ্জাতিক বজৰং দল’ৰ জিলা মিডিয়া ইনচাৰ্জ অংকিত মিশ্ৰই এই পোষ্টাৰ লগোৱাৰ কথা স্বীকাৰ কৰিছে। তেওঁ জনাইছে যে, চহৰৰ ৩০ৰ পৰা ৪০টা বিখ্যাত মন্দিৰৰ বাহিৰত এই পোষ্টাৰ লগোৱা হৈছে আৰু ভৱিষ্যতে আৰু আন কেইটামান মন্দিৰতো লগোৱা হ’ব। তেওঁৰ মতে, “ধৰ্মীয় ক্ষেত্ৰত মহিলাসকলে অগ্ৰণী ভূমিকা পালন কৰে। ভাৰতীয় সংস্কৃতি ৰক্ষাৰ দায়িত্ব তেওঁলোকৰ হাতত। সেয়েহে মন্দিৰলৈ আহোঁতে তেওঁলোকক ভাৰতীয় ঐতিহ্য অনুসৰি পোচাক পৰিধান কৰিবলৈ অনুৰোধ জনোৱা হৈছে।”
এই পোষ্টাৰক লৈ জব্বলপুৰত বিতৰ্কৰ সৃষ্টি হৈছে। চহৰৰ নাৰী অধিকাৰ সংগঠনৰ কৰ্মী তথা আইনজীবী ৰঞ্জনা কুৰাৰিয়াই কয়, “আমি কি পোচাক পিন্ধিম, সেয়া সিদ্ধান্ত লোৱাৰ অধিকাৰ কেৱল আমাৰ। আমি যি পোচাকত স্বাচ্ছন্দ্য অনুভৱ কৰো, সেই পোচাক পৰিধান কৰিব পাৰো। কোনোৱে আমাৰ ওপৰত সেয়া জোৰ কৰি দিব নোৱাৰে, আনকি অনুৰোধো কৰিব নোৱাৰে।”
