পি এইচ ডি বা মাষ্টাৰ ডিগ্ৰীৰ কোনো মূল্য নাই। আফগানিস্তানত এতিয়া কেৱল মোল্লাই সবাতোকৈ শ্ৰেষ্ঠ। এই দাবী কৰিছে তালিবান চৰকাৰৰ নৱনিযুক্ত শিক্ষামন্ত্ৰী শ্বেখ মৌলবী নুৰুল্লা মুনিৰে। আফগানিস্তানত মোল্লা মহম্মদ হাছান আখুন্দৰ নেতৃত্বত তালিবান বাহিনীয়ে চৰকাৰ গঠন কৰাৰ পিছতে বিভিন্ন বিভাগত মন্ত্ৰীও নিযুক্তি দিছে। দেশখনৰ শিক্ষা বিভাগৰ দায়িত্ব লাভ কৰা মৌলবী নুৰুল্লা মুনিৰে কয় যে, আফগানিস্তানত উচ্চ শিক্ষাৰ কোনো প্ৰয়োজন নাই। কাৰণ দেশখনৰ ক্ষমতা দখল কৰা শীৰ্ষ মোল্লা আৰু তালিবানী নেতাসকলৰ কাৰো পি এইচ ডি বা মাষ্টাৰ ডিগ্ৰী নাই। আনকি তেওঁলোকৰ স্কুলীয়া শিক্ষাও নাই। কিন্তু এই মোল্লাসকলে এতিয়া সবাতোকৈ শ্ৰেষ্ঠ। নতুন শিক্ষামন্ত্ৰীৰ এনে ঘোষণাক লৈ সাধাৰণ আফগান নাগৰিকৰ মাজত তীব্ৰ অসন্তুষ্টিয়ে দেখা দিছে।
যোৱা ২০ বছৰে দেশখনত গঢ়ি উঠা শিক্ষা ব্যৱস্থা তালিবানৰ শাসনত ভাঙি পৰাৰ আশংকা প্ৰকট হৈ পৰিছে। তালিবানী নেতাসকলে মহিলাৰ শিক্ষাৰ ক্ষেত্ৰতো কেইবাটাও নীতি–নিৰ্দেশনা জাৰি কৰিছে। ছাত্ৰীসকলে শ্ৰেণী কোঠালৈ হিজাব আৰু নিকাব পৰিধান কৰি আহিব লাগিব আৰু তেওঁলোকে ছাত্ৰসকলৰ পৰা পৃথকে বহিব লাগিব। শিক্ষামন্ত্ৰীৰ এনে ঘোষণাক লৈ দেশজুৰি আৰম্ভ হৈছে প্ৰতিক্ৰিয়াৰ।
