তালিবানৰ দখলত থকা আফগানিস্তানত এগৰাকী গৰ্ভৱতী সংবাদিকে সহায়ৰ বাবে হাহাকাৰ কৰিছে। সাংবাদিক চাৰ্লট বেলিছ সম্প্ৰতি আফগানিস্তানত আৱদ্ধ হৈ আছে। এগৰাকী গৰ্ভৱতী সাংবাদিকে কঠোৰ কভিড নীতিৰ বাবে ভয়াৱহ পৰিস্থিতিৰ সন্মুখীন হৈছে। নিউজিলেণ্ডৰ কভিড নিয়মবোৰ অতি কঠোৰ। সেয়েহে এনে কঠোৰ নীতিৰ বাবে কেৱল বেলিচেই নহয়, আন বহুতো কিৱি নাগৰিক আন দেশত বাহৰ পাতি থাকিব লগা হৈছে। কিন্তু নিজ দেশলৈ ঘূৰি যাবলৈ দিয়া হোৱা নাই। এতিয়া এই লোকসকলে ‘গ্ৰাউণ্ডেড কিৱি’ নামৰ এটা সংগঠন গঠন কৰিছে আৰু ইয়াৰ জৰিয়তে জেচিণ্ডা আৰ্ডেন চৰকাৰৰ নীতিৰ তীব্ৰ বিৰোধিতা কৰিছে।
উল্লেখ্য যে, বেলিছ ৭ মাহত দ্বিতীয়বাৰৰ বাবে সংবাদ শিৰোনামত আছে। যোৱা বছৰ আমেৰিকা যুক্তৰাষ্ট্ৰই সৈন্য স্থানান্তৰৰ সময়ত আফগানিস্তানলৈ গৈছিল বেলিছে। তালিবানে আফগান দখলৰ সময়ছোৱাত বেলিছে আল জাজিৰা নামৰ টিভি চেনেলটোৰ বাবে কাম কৰি আছিল। এই চেনেলটোৰ মুখ্য কাৰ্যালয় কাটাৰত আছে। মূৰত এটা স্কার্ফ লৈ বেলিছে তালিবান নেতাসকলক তালিবানৰ মহিলা আৰু ছোৱালীক অধিকাৰ দিয়া সন্দৰ্ভত কঠিন প্ৰশ্ন সুধিছিল। সেইগৰাকী সাংবাদিক এতিয়া গৰ্ভৱতী আৰু সম্প্ৰতি নিজ দেশৰ চৰকাৰে দেশলৈ ঘূৰি যাবলৈ অনুমতি দিবলৈ সাজু নহয়।
প্ৰণিধানযোগ্য যে, বেলিছে দ্য নিউজিলেণ্ড হেৰল্ডত এটা প্ৰবন্ধ লিখিছিল য’ত বৰ্ণনা কৰিছিল যে তাই কিমান কঠিন পৰিস্থিতিৰ মাজেৰে পাৰ হৈছে। ৩৫ বছৰীয়া বেলিছে লিখিছিল-মই আফগানিস্তানত আবদ্ধ হৈ আছোঁ আৰু ইয়াত তালিবানে মোক সহায় কৰি আছে। আমাৰ দেশত প্ৰযোজ্য কোভিড আৰু সংৰক্ষণ নিয়মৰ বাবে এনে পৰিস্থিতিৰ সন্মুখীন হ’ব লগা হৈছে।
এই ঘটনা পোহৰলৈ অহাৰ পিছতে গ্ৰাউণ্ডেড কিৱি সংগঠনটোৰ এজন মুখপাত্ৰ মাৰ্টিন নিউবেলে কয়-বেলিছেই নহয়, নিউজিলেণ্ডৰ শ শ লোক আন দেশত আৱদ্ধ হৈ আছে। আমি মাত মাতি আছো, কিন্তু কোনেও শুনিবলৈ সাজু নহয়। এয়াই মানৱ অধিকাৰ নেকি?
উল্লেখ্য যে, নিউজিলেণ্ডৰ জনসংখ্যা প্ৰায় ৫০ নিযুত। কভিড মহামাৰীয়ে সমগ্ৰ বিশ্বতে ভয়াৱহ ৰূপ লোৱাৰ সময়তো মাত্ৰ ৫২জন লোকৰহে মৃত্যু হৈছিল। তাৰ বিপৰীতে চুবুৰীয়া অষ্ট্ৰেলিয়াত ৪ হাজাৰ লোকে সংক্ৰমণত প্ৰাণ হেৰুৱাইছে। নিউজিলেণ্ড চৰকাৰে আৰোপ কৰা নতুন নিয়ম অনুসৰি দেশলৈ উভতি অহা লোকসকলে তেওঁলোকৰ নিজৰ ব্যয়ত হোটেলখনত ১০ দিনৰ বাবে আছুতীয়াকৈ থাকিব লাগিব। এই হোটেলবোৰ সেনাই পৰিচালনা কৰে। হোটেলবোৰৰ নম্বৰ দিয়া হৈছে, সেয়েহে অপেক্ষাৰ সময় বাঢ়িছে।
ইফালে গৰ্ভৱতী বেলিছে মে’ মাহত কেঁচুৱা জন্ম দিব। যোৱা বছৰ ছেপ্টেম্বৰত কাটাৰলৈ গৈছিল বেলিছে। কাটাৰত আল জাজিৰাৰ মুখ্য কাৰ্যালয় আছে। ইয়াতেই বেলিছে গম পাইছিল যে তাই আৰু সংগী ফ্ৰী লান্স সাংবাদিক জিম হুলিব্ৰোকৰ সন্তানৰ মাতৃ হ’বলৈ গৈ আছে। জিমে নিউয়ৰ্ক টাইমছৰ বাবে কাম কৰে। এতিয়া সমস্যাটো হৈছে কাটাৰত এগৰাকী অবিবাহিত মাতৃ হোৱাটো আইনৰ দ্বাৰা অপৰাধ। সেয়েহে কাটাৰত সকলো সুবিধা থকা স্বত্বেও বেলিছে তাত থাকিব নোৱাৰে। ইফালে যোৱা বছৰৰ নৱেম্বৰত চাকৰিও এৰি দিছিল। জিম বেলজিয়ামৰ নাগৰিক, কিন্তু বেলিছে তাত বেছি সময় থাকিব নোৱাৰে। যাৰ বাবে তেওঁলোকে আফগানিস্তানলৈ উভতি যাবব লগা হৈছিল। অৱশ্যে এই ক্ষেত্ৰত তালিবানেও ইয়াক অনুমোদন জনাইছিল।
তালিবানে বেলিছক আফগানিস্তানলৈ আহিবলৈ অনুমতি দিছিল, কিন্তু এটা চৰ্ততহে। কোনো তালিবানীক ক’ব নোৱাৰিব যে বেলিছ বিবাহিত নহয়। বেলিছে লিখিছে- নিউজিলেণ্ড চৰকাৰলৈ ৫৯খন নথি পত্ৰ প্ৰেৰণ কৰিছিলো আৰু জৰুৰীকালীনভাবে মোক ঘূৰি যাবলৈ অনুমতি দিবলৈ কৈছিলো। কিন্তু, চৰকাৰৰ লটাৰী প্ৰণালীৰ বাবে এইটো সম্ভৱ হৈ নুঠিল।
আনফালে নিউজিলেণ্ড চৰকাৰে কয় যে বেলিছৰ আবেদন সঠিক নাছিল। আমাৰ কৰ্মচাৰীসকলে বিদেশত থকাসকলক নতুন আবেদন দাখিল কৰাত সহায় কৰি আছে। চৰকাৰৰ ভাষ্যৰ বিপৰীতে একে সময়তে বেলিছে কয় যে আফগানিস্তানত গৰ্ভৱতী হোৱাটো মৃত্যুদণ্ডতকৈ কম নহয়। ইয়াত চিকিৎসা সুবিধা পৰ্যাপ্ত নহয়। উল্লেখ্য যে, যোৱা বছৰো নিউজিলেণ্ডৰ এগৰাকী গৰ্ভৱতী মহিলা একে নিয়মৰ বাবে আমেৰিকা যুক্তৰাষ্ট্ৰত আবদ্ধ হৈ আছিল।
