চুবুৰীয়া ৰাজ্যৰ আগ্ৰাসন চলিয়েই থাকে অসমৰ ভূমিত। মেঘালয়ৰ আগ্ৰাসন কোনো নতুন কথা নহয়। দুয়োখন ৰাজ্যৰ মাজত সীমা বিবাদক লৈ আলোচনা চলি থাকে যদিও তাৰ স্থায়ী সমাধান যেন বহু দূৰত। পুনৰ আগ্ৰাসীৰূপত মেঘালয়। এইবাৰ পশ্চিম গুৱাহাটী সমষ্টিৰ অন্তৰ্গত এটা অঞ্চলত আগ্ৰাসন চলাইছে মেঘালয়ে। অসমৰ মাটিত মেঘালয় চৰকাৰে নিৰ্মাণ কৰিছে ৱাটাৰ কেনেল।
ৰাজধানী চহৰ গুৱাহাটীৰ সমীপতে মেঘালয়ৰ আগ্ৰাসন
অসমৰ মাটিত মেঘালয় প্ৰশাসনে নিৰ্মাণ কৰিছে ৱাটাৰ কেনেল
আগ্ৰাসী মেঘালয়, নিৰ্বিকাৰ অসম চৰকাৰ-প্ৰশাসন
চিন্তিত পশ্চিম গুৱাহাটী সমষ্টিৰ ৰাণীবাৰীৰ বাসিন্দা
অসমত মেঘালয়ৰ আগ্ৰাসন কোনো নতুন কথা নহয়। আগ্ৰাসনক লৈ মাজে–সময়ে বিবাদ–সংঘাত চলি থাকে। সমান্তৰালভাৱে চলি থাকে সমস্যা সমাধানৰ আলোচনা। তাৰ মাজতেই চলে–বলে কৌশলেৰে অসমৰ মাটিত আগ্ৰাসন চলাই আছে। কেতিয়াবা যদি বিদ্যালয় স্থাপন কৰিছে, কেতিয়াবা পথ নিৰ্মাণ কৰিছে। এইবাৰ পশ্চিম গুৱাহাটীৰ অন্তৰ্গত ৰাণীবাৰীত মেঘালয় চৰকাৰে নিৰ্মাণ কৰিছে জলসিঞ্চনৰ নলা। প্ৰায় ৫০ লাখ টকা ব্যয় সাপেক্ষে অসমৰ খেতি পথাৰৰ মাজেৰে মেঘালয়ে নিৰ্মাণ কৰিছে এই নলা। যি কাৰ্য দেখি শংকিত–চিন্তিত হৈ পৰিছে স্থানীয় লোকসকল। স্থানীয় সচেতন লোকসকলে এই সন্দৰ্ভত প্ৰশাসনক অবগত কৰিছে যদিও কোনো গুৰুত্ব দিয়া নাই অসমৰ প্ৰশাসনে। অনাগত দিনত অঞ্চলটোত মেঘালয়ে অধিক আগ্ৰাসী ৰূপ ল’ব পাৰে বুলি শংকা প্ৰকাশ কৰিছে স্থানীয় লোকসকলে।
