নিজৰ জন্মদিনটো স্মৰণীয় কৰি দেশলৈ সোণৰ পদক কঢ়িয়াই আনিলে অসম কন্যা লাভলীনা বৰগোহাঁইয়ে। এছিয়ান গেমছ ২০২৬ৰ মহিলাৰ ৭৫ কেজি শাখাৰ ফাইনেলত চীনৰ বাও জিয়ীক ৫-০ ব্যৱধানত পৰাস্ত কৰি স্বৰ্ণ পদক জয় কৰে ভাৰতীয় বক্সাৰগৰাকীয়ে।
শুকুৰবাৰে অনুষ্ঠিত হোৱা হাই-ভল্টেজ ফাইনেলত আৰম্ভণিৰ পৰাই আত্মবিশ্বাসী প্ৰদৰ্শন আগবঢ়াই লাভলীনাই। পাঁচগৰাকী বিচাৰকৰ সৰ্বসন্মত সিদ্ধান্তত চীনৰ প্ৰতিদ্বন্দ্বীগৰাকীক পৰাস্ত কৰি এছিয়ান গেমছত প্ৰথমটো স্বৰ্ণ পদক নিশ্চিত কৰে লাভলীনাই।
এই জয় লাভলীনাৰ বাবে বিশেষ হৈ পৰিছে, কিয়নো ২ অক্টোবৰতেই তেওঁৰ জন্মদিন। ১৯৯৭ চনৰ ২ অক্টোবৰত জন্মগ্ৰহণ কৰা লাভলীনাই ২৯ সংখ্যক জন্মদিনত দেশক সোণৰ পদক উপহাৰ দিলে।
ইয়াৰ পূৰ্বে এছিয়ান গেমছৰ ছেমিফাইনেলত কাজাখস্তানৰ নাতালিয়া বোগদান’ভাক ৩-২ ব্যৱধানত পৰাস্ত কৰি ফাইনেলত প্ৰৱেশ কৰিছিল লাভলীনাই। তাৰ পূৰ্বে কোৱাৰ্টাৰ ফাইনেলত দক্ষিণ কোৰিয়াৰ ছিয়ং ছুয়নক ৫-০ ব্যৱধানত পৰাস্ত কৰি পদক নিশ্চিত কৰিছিল।
২০২২ চনৰ এছিয়ান গেমছত ৰূপৰ পদক লাভ কৰা লাভলীনাই এইবাৰ পদকৰ ৰং সলনি কৰি সোণ জয় কৰিলে। এই স্বৰ্ণ পদকে এছিয়ান গেমছত লাভলীনাৰ সাফল্যৰ নতুন অধ্যায় মুকলি কৰিলে।
লাভলীনাৰ এই ঐতিহাসিক জয়ৰ লগে লগে এছিয়ান গেমছৰ বক্সিঙত ভাৰতৰ বাবে এক গুৰুত্বপূৰ্ণ সাফল্যও সংযোজিত হ’ল। ভাৰতীয় মহিলা বক্সিঙত এছিয়ান গেমছৰ স্বৰ্ণ জয় কৰা মেৰী কমৰ পিছত লাভলীনা দ্বিতীয়গৰাকী ভাৰতীয় মহিলা বক্সাৰ হিচাপে পৰিগণিত হৈছে।
জন্মদিনত সোণৰ পদক—লাভলীনাৰ বাবে এয়া কেৱল ব্যক্তিগত সাফল্য নহয়, অসমৰ লগতে সমগ্ৰ ভাৰতৰ ক্ৰীড়াপ্ৰেমীৰ বাবে গৌৰৱৰ এক বিশেষ মুহূৰ্ত।
