সেউজ কাৰ্বি পাহাৰত অনুভূত হ’বলৈ লৈছে ৰাজনীতিৰ উত্তাপ। জিলাখনত আৰম্ভ হৈছে পৰিষদীয় নিৰ্বাচনৰ তৎপৰতা। ইতিমধ্যে শুকুৰবাৰৰ পৰা দুদিনীয়াকৈ কাৰ্বি আংলং জিলা ভ্ৰমণ কৰি গৈছে ৰাজ্যিক নিৰ্বাচন আয়ুক্ত অলক কুমাৰে। এই ভ্ৰমণকালতে বিষয়াগৰাকীয়ে জিলা উপায়ুক্ত, আৰক্ষী অধীক্ষক আৰু সংশ্লিষ্ট অন্যান্য বিষয়াসকলৰ লগত আলোচনাত মিলিত হয় আৰু নিৰ্বাচনী আয়োজন সন্দৰ্ভত আলোচনা চলায়। পিছত সাংবাদিকৰ সৈতে হোৱা বাৰ্তালাপত আয়ুক্ত কুমাৰে প্ৰকাশ কৰা মতে জুন মাহত কাৰ্বি আংলং স্বায়ত্বশাসিত পৰিষদৰ নিৰ্বাচন অনুষ্ঠিত হোৱাৰ সম্ভাৱনা আছে। উল্লেখ্য যে কাৰ্বি আংলঙৰ বৰ্তমানৰ পৰিষদখনৰ কাৰ্যকাল অহা ৩ জুলাইত উকলি যাব।
