আজি ২৬ জুলাই, দেশজুৰি উদযাপিত হ’ব কাৰ্গিল বিজয় দিৱস, যি দিনটো ভাৰতীয় সেনাই ১৯৯৯ চনত কাৰ্গিল যুদ্ধত পাকিস্তানৰ বিৰুদ্ধে জয় লাভ কৰিছিল। দেশৰ বিভিন্ন প্ৰান্তত এই বিশেষ দিৱস উপলক্ষে বীৰ সেনাসকলক শ্ৰদ্ধাঞ্জলি জনাই বিভিন্ন কাৰ্যসূচী আয়োজন কৰা হৈছে।
কাৰ্গিল যুদ্ধ ১৯৯৯ চনৰ মে’ মাহত আৰম্ভ হৈ জুলাই মাহলৈকে চলিছিল। জম্মু-কাশ্মীৰৰ কাৰ্গিল অঞ্চল আৰু নিয়ন্ত্ৰণ ৰেখাৰ (LoC) কাষৰ কিছুমান গুৰুত্বপূৰ্ণ স্থানত পাকিস্তানৰ সেনাই অনুপ্ৰৱেশ কৰাৰ ফলত এই সংঘাতৰ সূচনা হৈছিল।
পাকিস্তানী সেনাসকলে কাশ্মীৰী উগ্ৰপন্থীৰ বেশত নিয়ন্ত্ৰণ ৰেখা পাৰ হৈ অনুপ্ৰবেশ কৰিছিল। যদিও প্ৰাৰম্ভিকভাৱে পাকিস্তানে এই যুদ্ধত নিজৰ সংশ্লিষ্টতা অস্বীকাৰ কৰিছিল, কিন্তু যুদ্ধস্থলিত উদ্ধাৰ কৰা নথি-পত্ৰ আৰু পাকিস্তানৰ উচ্চপদস্থ নেতাসকলৰ স্বীকাৰোক্তিৰে তেওঁলোকৰ জড়িত থকা স্পষ্ট হৈ পৰে।
ভাৰতীয় স্থলসেনাই অপাৰেচন ‘বিজয়’ৰ অধীনত আৰু বায়ুসেনাই ‘অপাৰেচন সফেদ সাগৰ’ৰ অধীনত যৌথভাৱে অভিযান চলাই কাৰ্গিলৰ শিখৰসমূহ পুনঃদখল কৰিবলৈ সক্ষম হয়। ২৬ জুলাই তাৰিখে কাৰ্গিলৰ শিখৰত ভাৰতীয় ৰাষ্ট্ৰীয় পতাকা পুনৰ উৰুৱাই যুদ্ধ বিজয়ৰ ঘোষণা কৰা হয়।
এই যুদ্ধত শতাধিক সাহসী ভাৰতীয় সেনাই জীৱন বিসৰ্জন কৰিছিল। অসমৰ গৌৰৱ, বীৰ শ্বহীদ কেপ্টেইন জিন্টু গগৈয়ে এই যুদ্ধত নিজৰ প্ৰাণ আহুতি দিছিল। তেওঁৰ বলিদান আৰু সাহসিকতা আজি অসমবাসীৰ বাবে এক গর্বৰ বিষয়।
