বলিউড অভিনেতা তথা নৰ্থইষ্ট ইউনাইটেডৰ মালিক জন আব্ৰাহামে নিজৰ প্ৰিয় ফুটবলাৰৰ তালিকাত কোনো আন্তঃৰাষ্ট্ৰীয় তাৰকাৰ নাম নলৈ ভাৰতীয় ফুটবলৰ উদীয়মান প্ৰতিভাসকলক বাছি লৈছে। তেওঁৰ পছন্দৰ তালিকাত আছে পাৰ্থিৱ গগৈ, ৰিডিম ট্লাং আৰু গুৰমিত সিং ছাহাল।
মিডিয়া বাৰ্তালাপত আব্ৰাহামে কয় যে তেওঁ আন্তঃৰাষ্ট্ৰীয় খেলুৱৈৰ সলনি দেশীয় প্ৰতিভাক সমৰ্থন কৰাটোৱেই অধিক পছন্দ কৰে। তেওঁ কয়, “মই ভাৰতীয় আৰু মই মোৰ ভাৰতীয় খেলুৱৈসকলক ভাল পাওঁ।”
বিশেষকৈ পাৰ্থিৱ গগৈৰ নাম লোৱাটো অসমৰ ফুটবলপ্ৰেমীৰ বাবে বিশেষভাৱে তাৎপৰ্যপূৰ্ণ। শিৱসাগৰৰ পৰা ওলাই অহা এইগৰাকী যুৱ উইংগাৰে নৰ্থইষ্ট ইউনাইটেডৰ হৈ নিজৰ প্ৰতিভাৰ পৰিচয় দিছে। ISLৰ বিগত তিনিটা ছিজনত ৫৭খন মেচত পাৰ্থিৱে ১০টা গ’ল আৰু ৮টা এছিষ্ট কৰিছে।
দূৰৰ পৰা গ’ল কৰাৰ দক্ষতাৰ বাবেও পাৰ্থিৱ বিশেষভাৱে পৰিচিত। ২০২৬ চনৰ মে’ মাহতো ইণ্টাৰ কাশীৰ বিৰুদ্ধে ৩-২ গ’লৰ জয়ত শেষ মুহূৰ্তত পাৰ্থিৱৰ গ’লেই নৰ্থইষ্ট ইউনাইটেডক জয়ৰ সোৱাদ দিছিল।
জন আব্ৰাহমৰ এই পছন্দই পুনৰ এবাৰ ভাৰতীয় ফুটবলৰ লগতে উত্তৰ-পূৰ্বাঞ্চলৰ উদীয়মান প্ৰতিভাসকলক ৰাষ্ট্ৰীয় মঞ্চত উজলাই তুলিলে।
