উত্তৰ-পূৱ ভাৰতৰ চিকিৎসা শিক্ষা আৰু স্বাস্থ্যসেৱা ক্ষেত্ৰত নতুন শক্তিৰ সঞ্চাৰ ঘটিছে। University of Science and Technology Meghalaya (USTM)-এ প্ৰখ্যাত অনক’লজিষ্ট তথা Dr. B. Borooah Cancer Institute-ৰ প্ৰাক্তন সঞ্চালক ডাঃ এ. চি. কটকীক P.A. Sangma International Medical College & Hospital-ৰ মেডিকেল এডমিনিষ্ট্ৰেচনৰ সঞ্চালক হিচাপে নিযুক্তি দিছে।
ডাঃ কটকীৰ অনক’লজি, হাস্পতাল পৰিচালনা আৰু জনস্বাস্থ্য ব্যৱস্থাপনাত দীৰ্ঘদিনীয়া অভিজ্ঞতা আছে। তেওঁৰ নেতৃত্বত Dr. B. Borooah Cancer Institute-টো এটা উন্নত চিকিৎসা কেন্দ্ৰ হিচাপে পৰিণত হৈছিল।
USTM-ৰ সৈতে তেওঁৰ দীৰ্ঘদিনীয়া সম্পৰ্ক আছে। বিশ্ববিদ্যালয়খনৰ আৰম্ভণিৰ পৰাই তেওঁ ইয়াৰ যাত্ৰা নিকটৰ পৰা পৰ্যবেক্ষণ কৰি আহিছে। দায়িত্ব গ্ৰহণ কৰাৰ পিছতে তেওঁ বিশ্ববিদ্যালয়ৰ জ্যেষ্ঠ অধ্যাপক, ডীন আৰু প্ৰশাসনিক বিষয়াসকলৰ সৈতে এক বিস্তৃত মত বিনিময় সভা অনুষ্ঠিত কৰে। সভাত তেওঁ স্বচ্ছতা, জবাবদিহিতা আৰু ৰোগীকেন্দ্ৰিক সেৱা নিশ্চিত কৰাৰ ওপৰত বিশেষ গুৰুত্ব আৰোপ কৰে।
USTM কৰ্তৃপক্ষই ডাঃ কটকীৰ নিযুক্তিক অত্যন্ত গুৰুত্বপূৰ্ণ বুলি অভিহিত কৰি কৈছে যে তেওঁৰ নেতৃত্বত P.A. Sangma International Medical College & Hospital-এ অঞ্চলটোৰ চিকিৎসা শিক্ষা আৰু স্বাস্থ্যসেৱাৰ মান আৰু উন্নত কৰিব।
ডাঃ কটকীৰ এই যোগদানে USTMৰ চিকিৎসা শিক্ষা আৰু স্বাস্থ্যসেৱা খণ্ডক নতুন দিশ দিব বুলি আশা কৰা হৈছে।
