৭.২ প্ৰাবল্যৰ প্ৰবল ভূমিকম্পৰ জোকাৰণি অনুভূত হৈছে। মঙলবাৰে শক্তিশালী ভূমিকম্পত কঁপি উঠিল ইণ্ডোনেছিয়াৰ পূব প্ৰান্ত। ভূমিকম্পৰ অভিকেন্দ্ৰ আছিল মৌমাৰে চহৰৰ পৰা ১০০ কিলোমিটাৰ উত্তৰৰ সাগৰৰ ১৮.৫ কিলোমিটাৰ গভীৰতাত। ইয়াৰ পাছতেই অঞ্চলটোত ছুনামিৰ সতৰ্কতা জাৰি কৰা হৈছে।
২০০৪ চনতো ভূমিকম্পই ধ্বংসস্তুপলৈ পৰিণত কৰিছিল সূমাত্ৰা দ্বীপ। ৰিখটাৰ স্কেলত ৯.১ প্ৰাবল্যৰ ভূমিকম্পই ২ লাখ ২০ হাজাৰ লোক হতাহত হৈছিল। ইয়াৰে কেৱল ইণ্ডোনেছিয়াৰ ১ লাখ ৭০ হাজাৰৰো অধিক লোক মৃত্যুমুখত পৰিছিল।
প্ৰশান্ত মহাসাগৰীয় ৰিং অফ ফায়াৰত অৱস্থিতিৰ বাবে ইণ্ডোনেছিয়া প্ৰায়ে ভূমিকম্প আৰু আগ্নেয়গিৰিৰ বিস্ফোৰণৰ দ্বাৰা আক্ৰান্ত বা সন্মুখীন হ’ব লগা হয়।
