লখিমপুৰ জিলাৰ ফুলবাৰীৰ শান্তিপুৰৰ দুগৰাকী পিতৃ-মাতৃহীন নিঠৰুৱা কণমানিৰ বিষয়ে NKTVত ধাৰাবাহিক বাতৰি আৰু বিশেষ অনুষ্ঠান প্ৰচাৰ হোৱাৰ পিছতেই অসমৰ মুখ্যমন্ত্ৰী ড০ হিমন্ত বিশ্ব শৰ্মাকে প্ৰমূখ্য কৰি বহুলোকে দুয়োগৰাকী কণমানিক সহায় কৰিবলৈ আগবাঢ়ি আহিছে। ইয়াৰ সমান্তৰালভাৱে সমাজ কৰ্মী ড০ দিব্যজ্যোতি শইকীয়াই কণমানি দুগৰাকীৰ কাষত আজি উপস্থিত হৈ সহায়ৰ হাত আগবঢ়ায়। ড০ দিব্যজ্যোতি শইকীয়াই কণমানি দুগৰাকীক চুৱেটাৰকে আদি কৰি গৰম সাজপাৰ, বহী, কলম, পেন্সিলৰ লগতে কিছু পৰিমাণৰ আৰ্থিক সাহায্য প্ৰদান কৰে। উল্লেখযোগ্য যে, দুটা দশক জুৰি মানৱ অধিকাৰ কৰ্মী ড০ দিব্যজ্যোতি শইকীয়াই মানৱতাৰ হকে আগবঢ়োৱা উৎকৃষ্ট সেৱাৰ বাবে ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত শতাধিক বঁটাৰে সন্মানিত হৈছে।
