ডিব্ৰুগড় জিলা শিক্ষা আৰু প্রশিক্ষণ প্রতিষ্ঠানত (ডায়েট) ২২ মাৰ্চত এখন ফটোগ্রাফীৰ কর্মশালা অনুষ্ঠিত হয়। প্রশিক্ষার্থীসকলক ফটোগ্রাফীৰ মৌলিক দিশসমূহৰ লগত চিনাকি কৰোৱা, কেৰিয়াৰৰ পৰিসৰ সম্পৰ্কে অৱগত কৰোৱা তথা ব্যৱহাৰিক জ্ঞান দিয়াৰ উদ্দেশ্যে ‘Unlocking Creativity: Exploring Photography Techniques and Tips’ শীর্ষক ফটোগ্রাফী কর্মশালাখন অনুষ্ঠিত হৈছিল।
উক্ত কর্মশালাত সমল ব্যক্তিৰূপে উপস্থিত থাকে বিশিষ্ট আলোকচিত্র শিল্পী তথা দ্য ফটোগ্রাফী ক্লাব অৱ আছামৰ প্ৰতিষ্ঠাপক সভাপতি দেবাশিস গগৈ। ডি.এল.এড তৃতীয় ষান্মাসিকৰ প্ৰশিক্ষাৰ্থী প্ৰাৰ্চী বৰপাত্ৰ গোহাঁয়ে আঁত ধৰা কর্মশালাখনত শতাধিক প্রশিক্ষার্থীয়ে অংশগ্রহণ কৰে।
২ ঘণ্টা জুৰি চলা কর্মশালাখনত ফটো তোলাৰ বিভিন্ন নীতি-নিয়ম, কেমেৰা, লেন্সৰ প্ৰকাৰ, ফটোগ্রাফীত কেৰিয়াৰৰ পৰিসৰ আদি সম্পর্কে বিস্তাৰিতভাৱে আলোচনা কৰা হয়। কর্মশালাখনত প্রতিষ্ঠানৰ প্রবক্তা স্বৰাজ ফুকন, ৰঞ্জন বৰা আৰু সৰল কুমাৰ দাস উপস্থিত থাকে।
