ভাৰতত পৰোক্ষ ধূমপান অৰ্থাৎ আন কোনো ব্যক্তিয়ে কৰা ধূমপানৰ ধোঁৱা সেৱন কৰাটো এতিয়াও এক ডাঙৰ জনস্বাস্থ্যজনিত সমস্যা হৈছে। যদিও বিগত কেইটামান দশকত পৰোক্ষ ধূমপানৰ সংস্পৰ্শলৈ অহা লোকৰ শতকৰা হাৰ কিছু হ্ৰাস পাইছে, দেশৰ জনসংখ্যা বৃদ্ধি পোৱাৰ ফলত এনে লোকৰ মুঠ সংখ্যা বৃদ্ধি পাইছে।
তথ্য অনুসৰি, ১৯৯০ চনত ভাৰতত প্ৰায় ৩৭.৫ কোটি লোক পৰোক্ষ ধূমপানৰ সংস্পৰ্শলৈ আহিছিল। ২০২৩ চনত এই সংখ্যা বৃদ্ধি হৈ প্ৰায় ৪৪.৪ কোটিত উপনীত হয়। ইয়াৰ সৈতে সংগতি ৰাখি পৰোক্ষ ধূমপানৰ ফলত হোৱা মৃত্যুৰ সংখ্যাও বৃদ্ধি পাইছে। ১৯৯০ চনত প্ৰায় ২.১৭ লাখ লোকৰ মৃত্যু পৰোক্ষ ধূমপানৰ সৈতে জড়িত আছিল যদিও ২০২৩ চনত এই সংখ্যা প্ৰায় ৩.২৫ লাখলৈ বৃদ্ধি পায়।
২০২৩ চনত পৰোক্ষ ধূমপানৰ ফলত প্ৰায় ৯২.৮ লাখ সুস্থ জীৱন-বছৰ বিভিন্ন ধৰণৰ অসুস্থতা আৰু অক্ষমতাৰ বাবে হেৰুওৱা বুলি অনুমান কৰা হৈছে।
শিশু আৰু মহিলাৰ ওপৰত অধিক বিপদ
ঘৰত কোনো এজন ব্যক্তিয়ে ধূমপান কৰিলে তাৰ প্ৰভাৱ পৰিয়ালৰ আন সদস্যসকলৰ ওপৰতো পৰে। বিশেষকৈ শিশু আৰু মহিলাসকল এই ক্ষেত্ৰত অধিক ক্ষতিগ্ৰস্ত হ’ব পাৰে।
শিশুৱে পৰোক্ষ ধূমপানৰ ধোঁৱাৰ সংস্পৰ্শলৈ আহিলে শ্বাসনলীৰ সংক্ৰমণ, বাৰে বাৰে শ্বাসকষ্ট, হুইজিং আৰু হাঁপানীৰ দৰে সমস্যাৰ আশংকা বৃদ্ধি পাব পাৰে। কেঁচুৱাৰ ক্ষেত্ৰত হঠাৎ মৃত্যুৰ আশংকাও বৃদ্ধি হ’ব পাৰে।
শিশুৰ হাওঁফাওঁ সম্পূৰ্ণৰূপে বিকশিত হৈ নুঠাৰ বাবে ধূমপানৰ বিষাক্ত ধোঁৱাই তেওঁলোকৰ স্বাস্থ্যত অধিক ক্ষতিকাৰক প্ৰভাৱ পেলাব পাৰে। সেয়েহে শিশুৰ সুৰক্ষাৰ বাবে ঘৰখন ধূমপানমুক্ত কৰি ৰখাটো অতি গুৰুত্বপূৰ্ণ।
কেৱল হাওঁফাওঁ নহয়, হৃদযন্ত্ৰতো পৰে প্ৰভাৱ
পৰোক্ষ ধূমপানৰ ফলত কেৱল শ্বাস-প্ৰশ্বাসজনিত সমস্যাই নহয়, শৰীৰৰ আন গুৰুত্বপূৰ্ণ অংগতো নেতিবাচক প্ৰভাৱ পৰিব পাৰে। ই হৃদৰোগ, ষ্ট্ৰোক, হাওঁফাওঁৰ কৰ্কট ৰোগ, COPD, স্তন কৰ্কট আৰু টাইপ-২ ডায়েবেটিছৰ দৰে গুৰুতৰ ৰোগৰ আশংকা বৃদ্ধি কৰিব পাৰে।
ধূমপানৰ ধোঁৱাত থকা বিষাক্ত পদাৰ্থই শৰীৰত প্ৰদাহ আৰু oxidative stress বৃদ্ধি কৰে। লগতে ৰক্তনলীৰ স্বাভাৱিক কাৰ্যত ব্যাঘাত জন্মোৱাৰ লগতে ৰক্ত জমা হোৱাৰ প্ৰৱণতা আৰু insulin resistance বৃদ্ধি কৰিব পাৰে। ফলত নিজে ধূমপান নকৰা লোকো হৃদযন্ত্ৰ আৰু বিপাকীয় ৰোগৰ ঝুঁকিত পৰিব পাৰে।
চিকিৎসকৰ পৰামৰ্শ আৰু সজাগতা অতি জৰুৰী
চিকিৎসক আৰু স্বাস্থ্যকৰ্মীসকলে ৰোগীসকলৰ ঘৰত বা কৰ্মস্থলীত ধূমপানৰ ধোঁৱাৰ সংস্পৰ্শ আছে নেকি, সেই বিষয়ে নিয়মিতভাৱে সোধা উচিত। বিশেষকৈ শ্বাস-প্ৰশ্বাসৰ ৰোগ, কম বয়সতে হৃদযন্ত্ৰৰ সমস্যা অথবা কোনো স্পষ্ট কাৰণ নোহোৱাকৈ বিভিন্ন শাৰীৰিক সমস্যাত ভুগি থকা লোকৰ ক্ষেত্ৰত এই বিষয়টো গুৰুত্বসহকাৰে চোৱা প্ৰয়োজন।
স্বাস্থ্য বিশেষজ্ঞসকলৰ মতে, পৰোক্ষ ধূমপানৰ কোনো নিৰাপদ মাত্ৰা নাই। সেয়েহে কেৱল ধূমপায়ীজনক ধূমপান এৰিবলৈ কোৱাৰ পৰিৱৰ্তে পৰিয়ালৰ সকলো সদস্যক সামৰি সজাগতা সৃষ্টি কৰাটোও সমানেই গুৰুত্বপূৰ্ণ।
ধূমপানমুক্ত ঘৰ, পৰিয়ালকেন্দ্ৰিক সজাগতা আৰু ধূমপান ত্যাগত সহায় কৰা ব্যৱস্থা শক্তিশালী কৰিলে বিশেষকৈ শিশু আৰু মহিলাসকলক পৰোক্ষ ধূমপানৰ ক্ষতিকাৰক প্ৰভাৱৰ পৰা সুৰক্ষিত কৰিব পৰা যাব। ভাৰতত পৰোক্ষ ধূমপানৰ ক্ৰমবৰ্ধমান স্বাস্থ্যবোজা হ্ৰাস কৰিবলৈ এই বিষয়ত অধিক গুৰুত্ব দিয়াৰ প্ৰয়োজন আছে।
