ইউটিউবত প্ৰকাশ কৰা এটা ভিডিঅ’ক কেন্দ্ৰ কৰি ৰুজু হোৱা ২০১৮ চনৰ মানহানিৰ গোচৰত ইউটিউবাৰ ধ্ৰুৱ ৰাঠীৰ বিৰুদ্ধে শনিবাৰে নতুনকৈ জামিনযোগ্য গ্ৰেপ্তাৰী পৰোৱানা জাৰি কৰিছে দিল্লীৰ এখন আদালতে। পূৰ্বে জাৰি কৰা চমন জাননী প্ৰেৰণ কৰিবলৈ যোৱাৰ সময়ত ৰাঠীৰ বাসগৃহ বন্ধ হৈ থকা বুলি আদালতক অৱগত কৰাৰ পিছতে এই নিৰ্দেশ দিয়া হয়।
‘বাৰ এণ্ড বেঞ্চ’ৰ প্ৰতিবেদন অনুসৰি, দক্ষিণ-পূব দিল্লীৰ ন্যায়িক দণ্ডাধীশ প্ৰথম শ্ৰেণীৰ ৰাহুল জৈনে শনিবাৰে এই নতুন পৰোৱানা জাৰি কৰে। ৰাঠীৰ ইউটিউব চেনেলত প্ৰকাশ কৰা ‘BJP IT Cell Part II’ শীৰ্ষক ভিডিঅ’টোক কেন্দ্ৰ কৰি বিকাশ সংস্কৃত্যায়নে তেওঁৰ বিৰুদ্ধে এই গোচৰ ৰুজু কৰিছিল।
আদালতে গোচৰটোৰ পৰৱৰ্তী শুনানিৰ বাবে ৩১ অক্টোবৰৰ দিন ধাৰ্য কৰিছে। অৱশ্যে, আদালতৰ বিস্তৃত নিৰ্দেশ এতিয়াও প্ৰকাশ পোৱা নাই।
বিকাশ সংস্কৃত্যায়নে দাখিল কৰা অভিযোগ অনুসৰি, ধ্ৰুৱ ৰাঠীয়ে তেওঁৰ ইউটিউব চেনেলত প্ৰকাশ কৰা এটা ভিডিঅ’ত অভিযোগকাৰীৰ বিৰুদ্ধে মানহানিকাৰক বক্তব্য দিছিল। অভিযোগকাৰীৰ দাবী অনুসৰি, ভিডিঅ’টোত তেওঁৰ বিৰুদ্ধে কেইবাটাও মিছা অভিযোগ উত্থাপন কৰি সেইবোৰ প্ৰচাৰ কৰা হৈছিল। ‘বাৰ এণ্ড বেঞ্চ’ৰ প্ৰতিবেদনত এই কথা উল্লেখ কৰা হৈছে।
উল্লেখ্য যে, চলিত সপ্তাহৰ আৰম্ভণিতে অভিযোগকাৰীয়ে গোচৰটোৰ শুনানিৰ তাৰিখ আগুৱাই আনিবলৈ আবেদন জনাইছিল। পূৰ্বে গোচৰটোৰ শুনানিৰ দিন ২০ নৱেম্বৰত ধাৰ্য কৰা হৈছিল। ৰাঠী বৰ্তমান ভাৰতত আছে আৰু মুখ্য নিৰ্বাচন আয়ুক্তৰ বিৰুদ্ধে প্ৰতিবাদ তথা বিশেষ নিবিড় সংশোধন (SIR) প্ৰক্ৰিয়াক লৈ হোৱা প্ৰতিবাদত অংশগ্ৰহণ কৰিবলৈ আহিছে বুলি উল্লেখ কৰি শুনানিৰ তাৰিখ আগুৱাই অনাৰ আবেদন জনোৱা হৈছিল।
অভিযোগকাৰীৰ হৈ আদালতত উপস্থিত থকা অধিবক্তা সমক্ষ শৰ্মাই জনোৱা মতে, ৰাঠী জাৰ্মানী থাকে আৰু ‘ককৰোচ জনতা পাৰ্টি’ৰ প্ৰতিবাদত অংশগ্ৰহণ কৰিবলৈ ভাৰতলৈ আহিছিল।
সংবাদ মাধ্যমৰ প্ৰতিবেদন অনুসৰি, আদালতে উল্লেখ কৰে যে এই গোচৰটোত ধ্ৰুৱ ৰাঠীক প্ৰথমবাৰৰ বাবে ২০১৯ চনতে চমন জাৰি কৰা হৈছিল।
যোৱা ১২ অক্টোবৰত আদালতে নতুনকৈ চমন জাৰি কৰি সেইখন হাৰিয়ানাৰ গুৰুগ্ৰামত থকা ৰাঠীৰ বাসগৃহত প্ৰেৰণ কৰিবলৈ নিৰ্দেশ দিছিল। কিন্তু চমন জাননী প্ৰদানৰ বাবে যোৱাৰ সময়ত বাসগৃহটো বন্ধ হৈ থকা বুলি আদালতক অৱগত কৰা হয়। ইয়াৰ পিছতে শনিবাৰে তেওঁৰ বিৰুদ্ধে নতুনকৈ জামিনযোগ্য গ্ৰেপ্তাৰী পৰোৱানা জাৰি কৰা হয়।
