এটা এটাকৈ দেশৰ বহু কেইটা উদ্যোগ দখল কৰি গৈছে ৰিলায়েন্সে। এইবাৰ দেশৰ ঔষধ জগততো বলিব ৰিলায়েন্সৰ ধুমুহা। এই ধুমুহাত দেশৰ সৰু বৰ ঔষধ উদ্যোগ ধূলিস্যাত্ হৈ যোৱাৰ আশংকা। অসমৰ ঔষধ উদ্যোগতো সাম্ৰাজ্য গঢ়াৰ লক্ষ্য পুঁজিপতি গোষ্ঠীৰ। কোনে বাৰু পাহৰিব পাৰিব ২০১৬ চনৰ কথা? কি দৰে মুকেশ আম্বানী নেতৃত্বাধীন ৰিলায়েন্স গোষ্ঠীয়ে দেশত আৰম্ভ কৰিছিল ফ্ৰী ইণ্টাৰনেট সেৱা। কেনেকৈ অভিষেক ঘটিছিল Jio Telecomৰ? এটা বছৰ দেশবাসীক ফ্ৰি ইণ্টাৰনেট সেৱা দিয়াৰ ফলত দেশত অৰ্থনৈতিক ভাৱে কামিহাড় ভাঙি গৈছিল আন সকলো টেলিকম সেৱাৰ। তাৰ পৰৱৰ্তী পৰ্যায়ত আমি দেখা পালোঁ যে কিদৰে Jio টেলিকমে বৃদ্ধি কৰিছিল সেৱাৰ নিৰিখ, যাৰ সাক্ষী হৈ ৰ’লো আপুনি, মই আৰু আমি সকলো। এইবাৰ দেশৰ ঔষধ জগতত জাল পেলাবলৈ মহাপ্ৰস্তুতি ৰিলায়েন্সৰ।
ইটোৰ পাছত দেশৰ আনটো উদ্যোগ দখল কৰাৰ পাছত, এইবাৰ ৰিলায়েন্সৰ চকু দেশৰ ঔষধৰ জগতৰ ওপৰত। দেশত ঔষধৰ বজাৰ দখল কৰিবলৈ ইতিমধ্যে নামি গৈছে ৰিলায়েন্সৰ প্ৰতিনিধি সকল। ইতিমধ্যে অসমতো নামি গৈছে তেওঁলোক, সেই উদ্দেশ্যেৰে ৰাজ্যৰ সৰু-বৰ ফাৰ্মাচী সমূহক লক্ষ্য কৰি লৈছে বণিক গোষ্ঠীটোৱে, ফাৰ্মাচী সমূহক ঔষধ যোগান ধৰাৰ বাবদ ২৮-৩০ শতাংশ লাভৰ আশা দেখুৱাইছে। যাৰ তুলনাত অন্য সৰু-বৰ ঔষধৰ কোম্পানী অথবা ডিলাৰ সমূহে ৰাজ্য তথা দেশৰ ফাৰ্মাচীৰ গৰাকী সমূহক দি আছিল ১৬ৰ পৰা ২০ শতাংশ লাভহে। যিহেতু ব্যৱসায়ী এজনে য’ত বেছি লাভ হয় তাতে ব্যৱসায় কৰে, সেয়ে ৰিলায়েন্স কোম্পানী নিজৰ ব্যৱসায়িক অভিসন্ধিত সফল হোৱাৰ সম্ভাৱনা যথেষ্ট বেছি। গুৰুত্বৰ কথা এই যে, বণিক গোষ্ঠীটোৰ এই ব্যৱসায়িক জালত স্বাভাৱিকতে হয়তো কম সময়ৰ ভিতৰতে দেশত নোহোৱা হৈ যাব ঔষধৰ বেছি ভাগ সৰু বৰ কোম্পানী তথা ডিলাৰ সমূহ।
ইতিমধ্যে ফাৰ্মাচী ডিলাৰ এছ’চিয়েছনৰ মতে ২০১৬ চনত যিদৰে জিঅ’এ ফ্ৰি ইণ্টাৰনেট সেৱা আগবঢ়াই পৰৱৰ্তী পৰ্যায়ত সেই সেৱাত মাচুল লগাই দিছিল, ঠিক সেই পদ্ধতিৰে এইবাৰ ঔষধৰ বজাৰ দখল কৰিবলৈ অগ্ৰসৰ হৈছে ৰিলায়েন্স গোষ্ঠী। লগতে তেওঁলোকৰ এই জালত কোনোপধ্যেই নপৰে বুলিয়ো স্পষ্ট কৰি দিয়ে ডিলাৰ এছ’চিয়েছনৰ প্ৰতিনিধিয়ে। কোটি কোটি টকা জেপত লৈ দেশৰ ঔষধৰ বজাৰ দখল কৰাৰ উদেশ্যৰে এটা ডাঙৰ মাষ্টাৰ প্লেনৰ সৈতে বজাৰত নামিছে মুকেশ আম্বানী নেতৃত্বাধীন ৰিলায়েন্স গোষ্ঠী। ৰিলায়েন্সৰ এই ধুমুহাত কিমান দিনলৈ তিষ্ঠি থাকিব পাৰিব দেশৰ সৰু-বৰ ঔষধৰ কোম্পানী সমূহ? লগতে ঔষধৰ যোগান লাভ কৰাৰ বিনিময়ত কিমান দিনলৈ লাভৰ এই মায়াজালৰ পৰা আঁতৰি থাকিব পাৰিব ফাৰ্মাচীৰ মালিকসকল? সময়েহে এই সকলো কথাৰ উত্তৰ দিব।