ডিমৌৰ জামুকতলত এজন যুৱকৰ মৃতদেহ তেওঁৰ গাড়ীৰ ভিতৰতে উদ্ধাৰ কৰা হৈছে। মৃত যুৱকজন থাওৰা মাজগাঁৱৰ হিতেশ্বৰ গগৈৰ একমাত্ৰ পুত্ৰ পৰাগ জ্যোতি গগৈ (২৬) বুলি চিনাক্ত কৰা হৈছে।
আজি সন্ধিয়া ৩৭নং ৰাষ্ট্ৰীয় ঘাইপথৰ কাষত থকা এডোখৰ মাটিত AS-06-M-5695 নম্বৰৰ ইয়ন গাড়ীখনৰ ভিতৰত পৰাগ জ্যোতি গগৈৰ মৃতদেহ স্থানীয় লোকে প্ৰত্যক্ষ কৰে। বিয়লি ১:৩০ বজাৰ পৰা গাড়ীখন একে স্থানতে ৰৈ আছিল বুলি জনা গৈছে। সন্ধিয়ালৈকে গাড়ীখন ৰৈ থকাত সন্দেহবশতঃ স্থানীয় লোকে পৰীক্ষা কৰোতে ঘটনা পোহৰলৈ আহে।
স্থানীয় লোকে জনাইছে যে, পৰাগ জ্যোতি গগৈৰ সৈতে থাওৰা মাজগাঁৱৰ বিশ্বজিৎ গগৈ ওৰফে কেম্বেল নামৰ এজন যুৱক আছিল। বিশ্বজিৎ গগৈক ড্ৰাগছ সৰবৰাহকাৰী বুলি পৰিচিত। ৰাইজৰ দাবী অনুসৰি, বিশ্বজিতে দিয়া ড্ৰাগছ সেৱন কৰিয়েই পৰাগ জ্যোতি গগৈৰ মৃত্যু হৈছে। মৃত্যুৰ পিছতে বিশ্বজিৎ গগৈয়ে নিজৰ গাড়ীৰে পলায়ন কৰে বুলি জানিব পৰা গৈছে।
উল্লেখযোগ্য যে, বিগত দিনতো বিশ্বজিতৰ কবলত পৰি থাওৰাৰে আন এজন যুৱকে একেধৰণে গাড়ীৰ ভিতৰত প্ৰাণ হেৰুৱাইছিল।
ডিমৌ আৰক্ষীয়ে ঘটনাস্থলীৰ পৰা মৃতদেহ উদ্ধাৰ কৰি তদন্ত আৰম্ভ কৰিছে। ড্ৰাগছ সেৱনৰ বাবেই মৃত্যু হৈছে নেকি সেয়া পোষ্ট মৰ্টেম ৰিপ’ৰ্টৰ পিছতহে স্পষ্ট হ’ব। আৰক্ষীয়ে বিশ্বজিৎ গগৈক গ্ৰেপ্তাৰ কৰাৰ বাবে অভিযান চলাইছে।
