সামাজিক মাধ্যমৰ ফিডত এতিয়া আকৌ ঘূৰি আহিছে ৮০ৰ দশক। কিন্তু এইবাৰ সময়ৰ যাত্ৰা কৰাইছে কৃত্ৰিম বুদ্ধিমত্তা অৰ্থাৎ AI-য়ে। বিগত কিছুদিন ধৰি সামাজিক মাধ্যমত ভাইৰেল হৈ পৰিছে নিজৰ ফটো ৮০ৰ দশকৰ পুৰণি ফটোৰ ৰূপত পৰিৱৰ্তন কৰাৰ ট্ৰেণ্ড।
নতুন এই ChatGPT ট্ৰেণ্ডত ব্যৱহাৰকাৰীয়ে নিজৰ ছেলফি আপলোড কৰি নিৰ্দিষ্ট প্ৰম্পটৰ জৰিয়তে ফটোখনক ৮০ৰ দশকৰ ফটোগ্ৰাফৰ ৰূপ দিবলৈ চেষ্টা কৰিছে। ধুনীয়া চুলি, ভিনটেজ পোছাক, ডাঙৰ ষ্টেটমেণ্ট জুৱেলাৰী, উষ্ণ ষ্টুডিঅ’ লাইটিং, ম্লান ৰঙ আৰু পুৰণি ফিল্মৰ গ্লেম। এই সকলোবোৰৰ সংমিশ্ৰণে এখন সাধাৰণ আধুনিক ছেলফিক পুৰণি পৰিয়ালৰ এলবাম, বলীউডৰ আলোচনী বা ৮০ৰ দশকৰ বিবাহৰ ষ্টুডিঅ’ ফটোৰ দৰে কৰি তুলিছে।
ইতিমধ্যে সামাজিক মাধ্যমত এই ট্ৰেণ্ডে ব্যাপক জনপ্ৰিয়তা লাভ কৰিছে। বহু ব্যৱহাৰকাৰীয়ে ৮০ৰ দশকৰ বলীউডৰ ৰূপৰ লগতে বিভিন্ন আঞ্চলিক সাজ-পোছাক আৰু শৈলীৰে নিজৰ AI-নিৰ্মিত ৰেট্ৰ’ ফটো সামাজিক মাধ্যমত শ্বেয়াৰ কৰিছে। কিন্তু ইয়াৰ মাজতো আছে কিছু গোপন কথা।
এই ট্ৰেণ্ডত অংশগ্ৰহণ কৰাৰ পূৰ্বে এটা গুৰুত্বপূৰ্ণ কথা মনত ৰখা প্ৰয়োজন। AI চেটবটত নিজৰ ফটো আপলোড কৰাৰ অৰ্থ হৈছে ব্যক্তিগত তথ্য এটা ডিজিটেল সেৱাৰ সৈতে শ্বেয়াৰ কৰা। সেয়েহে ফটো আপলোড কৰাৰ আগতে কেইটামান গোপনীয়তাৰ দিশ বিবেচনা কৰাটো জৰুৰী।
এখন স্পষ্ট ছেলফি কেৱল এখন সাধাৰণ ফটো নহয়। মুখমণ্ডলৰ ছবিৰ জৰিয়তে এজন ব্যক্তিক চিনাক্ত কৰিব পৰা যায়। পৰিস্থিতি আৰু প্ৰযোজ্য আইনৰ ওপৰত নিৰ্ভৰ কৰি এনে তথ্য বায়’মেট্ৰিক বা ব্যক্তিগত তথ্য হিচাপে গণ্য হ’ব পাৰে।
AI প্লেটফৰ্মে আপলোড কৰা ছবি বা চেট কিমান দিনলৈ সংৰক্ষণ কৰে, সেই বিষয়ে আগতীয়াকৈ জানি লোৱা উচিত। কিছুমান সেৱাত অস্থায়ী চেট বা অতিৰিক্ত গোপনীয়তা নিয়ন্ত্ৰণৰ সুবিধা থাকিব পাৰে। সেয়েহে AI-য়ে ফটো নিৰ্মাণ কৰি দিয়াৰ পাছতে মূল ছবিখন সম্পূৰ্ণৰূপে আঁতৰাই পেলোৱা হয় বুলি ধৰি লোৱা উচিত নহয়।
বিভিন্ন AI প্লেটফৰ্মৰ তথ্য ব্যৱহাৰৰ নীতি একে নহয়। কিছুমান সেৱাই চেট বা আপলোড কৰা তথ্য AI মডেল উন্নত কৰাৰ বাবে ব্যৱহাৰ কৰিব পাৰে। গতিকে ব্যক্তিগত ফটো আপলোড কৰাৰ আগতে সংশ্লিষ্ট সেৱাৰ ডাটা কণ্ট্’ল আৰু প্ৰাইভেচী ছেটিংছ পৰীক্ষা কৰাটো গুৰুত্বপূৰ্ণ।
এখন ফটোত কেৱল মুখখনেই নাথাকে। পটভূমিত থকা ঘৰ, কাৰ্যালয়, বিদ্যালয়, পৰিয়ালৰ সদস্য, গাড়ীৰ নম্বৰ প্লেট, নথি-পত্ৰ বা স্থানৰ পৰিচয়ো প্ৰকাশ পাব পাৰে। AI-ৰ বাবে কেৱল মুখৰ প্ৰয়োজন হ’লে অতিৰিক্ত ব্যক্তিগত তথ্য থকা ফটো আপলোড নকৰাই ভাল।
গ্ৰুপ ফটো AI-ত আপলোড কৰিলে তাত থকা আন ব্যক্তিসকলৰ মুখ আৰু ব্যক্তিগত তথ্যও প্ৰক্ৰিয়াকৰণ হ’ব পাৰে। বিশেষকৈ শিশু, সহকৰ্মী বা নিজৰ ছবি AI-ত ব্যৱহাৰ কৰিবলৈ অনুমতি নিদিয়া লোকৰ ফটো আপলোড কৰাৰ ক্ষেত্ৰত অধিক সাৱধান হোৱা উচিত। এখন ছেলফিৰ সৈতে নাম, ফোন নম্বৰ, কৰ্মস্থলী, ঠিকনা বা জন্মদিনৰ দৰে তথ্য সংযুক্ত কৰিলে এজন ব্যক্তিৰ বিষয়ে অধিক বিস্তৃত ডিজিটেল প্ৰফাইল সৃষ্টি হ’ব পাৰে। সেয়েহে AI-য়ে যিমানখিনি তথ্য প্ৰয়োজন হয়, কেৱল সিমানখিনিহে শ্বেয়াৰ কৰাটো নিৰাপদ।
চেট ডিলিট কৰাৰ অৰ্থ এইটো নহয় যে প্ৰতিটো কপি বা সংৰক্ষিত সংস্কৰণ তৎক্ষণাৎ সম্পূৰ্ণৰূপে মচি পেলোৱা হৈছে। বিভিন্ন সেৱাৰ ডাটা সংৰক্ষণ, ডিলিট আৰু বেকআপৰ নীতি বেলেগ বেলেগ। সেয়েহে গোপনীয়তাক লৈ চিন্তিত হ’লে সংশ্লিষ্ট প্লেটফৰ্মৰ নীতি ভালদৰে পঢ়ি লোৱা উচিত। পাছপ’ৰ্ট, আধাৰ কাৰ্ড, PAN কাৰ্ড, ড্ৰাইভিং লাইচেন্স, বেংক ষ্টেটমেণ্ট, চিকিৎসা-সম্পৰ্কীয় নথি, ব’ৰ্ডিং পাছ, পাছৱৰ্ড বা OTP থকা স্ক্ৰীণশ্বট আদি অতি সংবেদনশীল নথি AI প্লেটফৰ্মত আপলোড কৰাৰ পৰা বিৰত থকাই উচিত।
ইফালে, AI-ৰে তৈয়াৰ কৰা ৮০ৰ দশকৰ ৰেট্ৰ’ ফটো সামাজিক মাধ্যমত ৰাজহুৱাভাৱে শ্বেয়াৰ কৰিলেও নতুন গোপনীয়তাৰ আশংকা সৃষ্টি হ’ব পাৰে। মূল ফটোখন ইতিমধ্যে AI সেৱাৰ সৈতে শ্বেয়াৰ কৰা হৈছে আৰু নতুনকৈ সৃষ্টি কৰা ছবিখনো অনলাইনত আন লোকৰ দৃষ্টিগোচৰ হ’ব পাৰে।
৮০ৰ দশকৰ এই AI ফটো ট্ৰেণ্ড নিঃসন্দেহে আমোদজনক। নিজৰ আধুনিক ৰূপটোক পুৰণি সময়ৰ ফটোৰ দৰে দেখি বহু লোকেই ইয়াক উপভোগ কৰিছে। কিন্তু যিকোনো AI ট্ৰেণ্ডত অংশ লোৱাৰ পূৰ্বে নিজৰ ব্যক্তিগত তথ্য কেনেদৰে ব্যৱহাৰ হ’ব, কিমান দিন সংৰক্ষণ কৰা হ’ব আৰু ডিলিট বা গোপনীয়তাৰ কি কি সুবিধা আছে। সেই সকলোবোৰ তথ্য জানি লোৱাটো অত্যন্ত গুৰুত্বপূৰ্ণ।
সেয়েহে ৮০ৰ দশকৰ ৰেট্ৰ’ লুকৰ মজা লওক, কিন্তু ফটো আপলোড কৰাৰ পূৰ্বে নিজৰ গোপনীয়তাৰ কথাও এবাৰ ভাবি চাওক।
